British lalnu, Queen Elizabeth II-na chu Thawhtannia vui turin ruahmanna siam a ni a, a vui inkhawm hi kum tam tak chhunga UK-a lal chhungkua leh politician lawkte a mikhual tam ber tum a nih ngei rin a ni.
Lalnu vuina inkhawma tel tura sawmna hi sem chhuah tan mek a ni a, ram hotu leh an aiawh mi 500 vel tel tura beisei a ni.
Ram hrang hrang hruaitute hi tin dan pangngai lo ang deuhvin sumdawng thlawhna hmanga kal tura tih an ni a, tumhmun atangin London khawthlang lama vuina tur hmun panpui an ni ang.
Westminster Abbey-a vui inkhawmah hian mi 2,200 vel tel tura ngaih a ni.
Europe-a lal chhungkaw hrang hrangte chu tel tura sawm an ni hlawm a, heng mite hi Queen nena thisena inzawmte an ni hlawm deuh.
Belgium King Philippe leh Queen Mathilde chuan an tel tur thu an tichiang tawh a, King Willem-Alexander leh a nupui, Queen Maxima bakah lal nu, Dutch queen thin, Princess Beatrix pawhin tel an tum.
Spain atangin King Felipe leh Queen Letizia chuan sawmna an pawm tawh a; Norway, Sweden, leh Denmark ram lalte pawhin tel an tum.
White House chuan President Joe Biden leh First Lady Jill Biden te chu an tel dawn tih an tichiang tawh a; mahse, bus-a phurh an ni tur chu an hre thiam chiah lo.
President Biden-a hma chiaha mi, Donald Trump chu sawm a ni dawn em tih inhnialna a awm mek a, US aiawha kal turte hi tam a remchang lo va, president hlui dangte pawh an tel a rinawm chiah lo.
Hetih lai hian president leh first lady hlui thenkhat chuan mi mala sawmna an dawng nia sawi a awm a. Heng zingah hian Obama nupa pawh an tel.
Kum 1977 leh 1981 inkara president, Jimmy Carter chuan sawmna a dawng lo niin a pisa chuan Politico an hrilh.
Queen-in ro a relna, Commonwealth am atang pawhin eng emaw zat a vuina inkhawmah hian tel tura beisei an ni.
Australian Prime Minister Anthony Albanese chuan sawmna a pawm thu leh New Zealand Prime Minister Jacinda Ardern leh Canadian Prime Minister Justin Trudeau te pawhin an tel tur thu an tichiang tawh.
Commonwealth hnuaia queen aiawha roreltu, governor-general eng emaw zat pawh an ram hruaitute nen an tel tura ngaih a ni.
Bangladeshi prime minister rei tak ni tawh, Sheikh Hasina leh Sri Lankan President Ranil Wickremesinghe te pawhin sawmna an pawm tawh nia sawi a ni a. Indian Prime Minister Narendra Modi erawh chuan a tel tur thu a la tichiang lo.
Ram hruaitu dang sawm zingah Irish Taoiseach Micheal Martin, German President Frank-Walter Steinmeier, and Italian President Sergio Mattarella bakah European Commission President Ursula von der Leyen te pawh an tel.
South Korean President Yoon Suk-Yeol leh Brazilian President Jair Bolsonaro te pawhin an tel dawn tih an tichiang tawh.
Japanese Emperor Naruhito, Turkish President Recep Tayyip Erdogan leh French President Emmanuel Macron te pawh tel tura beisei an ni.
Hripui a len hnua a vawi khat nana ram pawna zin chhuak mek, Kazakhstan leh Uzbekistan tlawh mektu, Chinese President Xi Jinping chu a tel dawn em tih hriat a la ni lo va, sawm a ni em tih leh a pawm em tih pawh hriat a ni lo.
Nuclear programme a kalpui nasat avanga hrek tuar nasa, Iran chuan ram palai chauh an teltir dawn tih an sawi tawh tih Whitehall chuan a puang.
Russia, Belarus leh Myanmar atanga tel tur an awm lo niin BBC chuan a tar lang.
UK leh Russia inkar hi chhe ngai lo mah se tun hnaia Russia-in Ukraine a rûn atangin a chhe hle a, Russian President Vladimir Putin-a thupuangtu chuan kar hmasa khan vuinaa tel tumna a neih loh thu a lo sawi tawh.
Ukraine rûn hian Belarus pawh a tihrang a, an president, Aleksandr Lukashenko hi President Putin-a lamtang tha tak a ni.
UK hian Myanmar-ah hian sipaiten February, 2021-a thuneihna an chan atang khan an palaite an kokir vek tawh bawk.