Aizawl: India state cooperative bank inthlunzawmna pawl, National Federation of State Cooperative Banks Ltd (NAFSCOB) chuan nimin khan Aijal Club-ah Annual General Meeting an nei a, Minister of State Lalruatkima’n a hmanpui.
Lalruatkima chuan NAFSCOB hmalakna sawiin cooperative bank sum lak luh atanga interest tax lak thin nuai bo turin NAFSCOB hian sorkar laipui hlawhtling takin a dawr tih a sawi a; Cooperative Credit movement-in harsatna a tawhte zirchiang tur leh hmarchhak state-a hmasawnna hna chak zawka thawh a nih theih nan RACNER an din tih a sawi bawk.
NAFSCOB chu cooperative bank leh Reserve Bank of India, state sorkar, sorkar laipui, NABARD leh financial institution dang nena inthlunzawmna pawimawh a nih avangin cooperative bank-te hmasawn zelna tur atanga kawng pawimawh ber an nih thu Ruatkima chuan a sawi bawk.
NAFSCOB hian Annual General Meeting thlengtu atan bank dinhmun tha leh hmasawna a ngaihte a ruat thin a, Mizoram Cooperative Apex Bank Ltd pawh tun hnai kum 10 chhunga India rama state cooperative bank hmasawn ber pakhat a nih avangin meeting hi thlentir a ni.
Annual meeting an neihah hian India ram state cooperative bank hrang hrang atangin palai 40 telin hmalakna an neih mekte bawhzui dan tur leh cooperative bank leh Short Term Cooperative Structure tihchakna tura hmalak dan tur an rel a ni.
Annual General Meeting hawnna inkhawmah hian NAFSCOB Managing Director Bhima Subrahmanyam, NAFSCOB Chairman Konuduru Ravinder Rao leh Mizoram Cooperative Apex Bank Chairman T Lalmuanpuii ten thu an sawi a bawk a ni.