Ukrainian thuneitute chuan tun hnaia anmahni rûntute laka beihpui an thlak meka hma an sawn mek zel laiin khawhchhak lama Donbas region-a khuate lak tumin an che leh mek tih an sawi.
Tun hnai ni reilo te chhungin Ukraine sipai hian ram zau tak an la a, Russian sipaite pawh an tawlh kir rawk rawk phah.
President Volodymyr Zelensky chuan a sipaite hian Kharkiv region-ah ringawt pawh sq km 8,000-a zau ram an luah leh tak thu a sawi.
US President Joe Biden chuan Ukraine hmasawnna chu ‘pawimawh tak’ a nih thu a sawi.
Biden-a hian hma lam pana kalnaa hlawhtlinna chu a hlimawm a tih rualin nawr letna na tak a thleng thei tih a sawi bawk.
Russia hian Ukraine ram hmun ngaa thena hmun khat an la thunun a, an rûn tan tirha awlsam taka an lak, Donbas chu Kyiv sipaiten chak taka hma lam an pan mekah hian an chân mai rinna a lian hle.
Kyiv leh khawpui lian dangte an lak theih loh hnuah khan Russia hian anmahni thlawk helhovin hmun eng emaw zat an thunun lai, Donbas hi an bei ngawrh zui a, harsa lem lo takin an la ta mai reng a ni.
Donbas region-a province pahnih awma pakhat zawk, anmahni thua ram anga inchhal, Luhansk People’s Republic-a an sipai commander, Andrey Marochko chuan indona hi an huam chhung ramri bul maiah a awm tan tawh niin Russian sorkar chanchinbu hnenah a sawi.
Luhansk-a Ukraine sorkar hotu thin, tlanchhe ta, Serhiy Hayday pawhin Ukrainian sipaite leh Russian-te hi Lyman khaw dai lawkah an inpawmchilh tan tawh niin a sawi bawk.
“Lyman-ah inbeihna nasa tak a awm mek a, ni rei vak lo chhung chu a la awh ang,” tiin Hayday chuan Telegram-ah a tar lang.
Lyman hi May thla tawpa Russian sipaiten an thunun tan kha a ni a. Donetsk People’s Republic thuthmun, Donetsk atanga km 150 pawh tling lo a ni.
Russian sipaiten an lak khan Moscow tan kawng awlsam sawtin khawchhak leh khawthlang inpawhna kawngpui pawimawh pawh an thunun nghal a ni.
Hmun dangah Ukrainian sipaite hian Russian ramri an hnaih hle tawh bawk a. Hayday-a chuan khaw pahnih, Izyum leh Kupiansk an lak chuan Russian-te awp lai, Severodonetsk leh Lysychansk-a mite châk lakna a tibuai hle thei dawn niin a sawi.
Ukraine-in ram an la nia an sawi hi a finfiahna a awm thei rih lo va; mahse, Nilaini khan Zelensky-a chuan Izyum tlawhin Ukrainian sipaite nen pawh an inkawm a, he khua hi an la ngei ni chuan a lang.