Coach thar hnuaia an inkhel vawikhatnaah Chelsea an chak thei lova. Red Bull Salzburg nen 1-1 in UEFA Champions League-ah an inhnehtawk.
Nilaini zanah Blues in Stamford Bridge-ah Austrian club an mikhual a. Graham Potter hnuaia an match hmasa ber an khel. Hnehna an chan zawh loh avang hian Champions League knockout stage luhna kawng an tan a harsa zual sawt dawn.
Potter-a’n a team thar inkhel a siksawi a. Raheem Sterling chu left wing-back leh left midfielder mawhphurhna la kawp turin a chhawr a, a ti fuh. England forward in minute 48-naah goal a khung.
Kar hmasa a Group E inkhelah Dinamo Zagreb hma a an mualpho tuma inkhel aiin Chelsea inkhel a tha zawk a. Khelmual chhunga team tha zawk an nihna a lang.
Mahse minute 75-naah goal an chhuah a, Thiago Silva-’n Salzburg player-te a dan theih loh hnuah Junior Adamu cross chu Noah Okafor-a’n goal-ah a chantir.
Chelsea wing-back Sterling leh Marc Cucurella te tlarhnungah an let hman loh chu an khingpuiten remchangah an la a, goal an khung. Mahse Reece James leh substitute Hakim Ziyech te hmangin Blues in chakna goal an khung teuh.
Chelsea boss Potter chuan, “Kan result a lungawithlak loh a, mahse kan player-ten theihtawp an chhuah. Goal tha tak kan khung hnuah second half kan tlahniam deuh. An goalkeeper in save tha tak tak a siam bawk.” tiin inkhel zawhah a sawi.
Haaland bawk a ropui
Manchester City striker Erling Haaland chuan a club thar tana bul a tan that a chhunzawm a. A club hlui lakah goal ropui khungin 2-1 in Borussia Dortmund lakah an chak.
Etihad Stadium-ah Dortmund hian England midfielder Jude Bellingham hmangin minute 56-naah goal an khung hmasa a. Hemi hma zawng hian City in beisei an phak loh laiin Dortmund an kheltha.
Huntawp dawn lamah Pep Guardiola pawlten an damna an hmu a, minute 80-naah John Stones-a’n goal mawi hmanga an si phurh sutin minute 84-naah Haaland-a’n boruaka ball kang lai nalh takin a kheng lut a. Chakna goal a khung.
Haaland-a coach Guardiola chuan, “Hmanag Barcelona tana Johan Cruyff goal ropui khung ang kha a ni. Goal ropui tak a ni.” tiin inkhel zawhah an chakna goal chu a sawi zui.
Juve an la tlawm
Vawi hnih European champion ni tawh Benfica in Juventus lakah 2-1 in hnehna an chang a. Joao Mario leh David Neres te goal khung hmang a chakin Champions League Group H-ah khelh hnih atangin point ruk an hmu mek.
Juve hian kum 50 chhunga a vawi khat nan Europe inelna lian berah a zawnin vawi thum an tlawmna a ni a. Inkhel dangah PSG in Lionel Messi, Kylian Mbappé leh Neymarte goal an chakpui.