Aizawl: New Delhi-a cham mek, Chief Minister Zoramthanga’n prime minister leh union defence minister te kawmin Mizoram mamawh hrang hrang a thlen.
Zorama hian nimin khan Union Defence Minister Rajnath Singh chu a pisaah kawmin cantonment board area (sipai chen khawmna hmun)-ah Mizoramin hmun a mamawh ve thu a thlen a, cantonment board area-a state-te tan ram dil theihna hmun awmah hian hmalaksak tura ngenin, minister pawhin a ngaihtuah turte hnena thlen a theih anga bawhzuisak a tum tur thuin a chhang.
India leh Myanmar ramri chungchang pawh Zorama leh Singh chuan an sawi dun a. Chief minister chuan Bangladesh leh Myanmar ramri pahnihah Mizo telna paramilitary force dah tha a tih thu a sawipui a, a tul anga la sawiho ni se tiin home minister nen pawh sawiho tha a tih thu defence minister chuan a sawi.
Nilaini khan Zorama hian Prime Minister Narendra Modi chu a chennaah hmuin Myanmar-a remna siam turin India-in hma a lak a ngaih thu a thlen a, Modi-a pawhin ngai pawimawhin theihtawp chhuah a nih tur thuin a chhang.
Heng bakah hian Assam Rifles sawn chhuah vat a tul thu te, MNF returnee-te tana in sakna tur puihna hma lo chhawp tawhte tih hlawhtlin a nih nana tanpui mamawhna te a sawipui a. Mipuiin HUDCO atanga loan an lo lak tawh, Rs vaibelchhe 18 vel an laka rulh loh la awm rulhsak tura a ngen bakah chief secretary atana Mizo tawng thiam ngei pek a ngaih thu te Modi hnenah hian a thlen bawk niin sorkar thuchhuah chuan a tar lang.