South Korean police chuan thla hmasaa New Zealand-a suitcase-a naupang ruhro pahnih chhar chungchangah a thattua an puh, naupangte nu nia hriat an man tih puang.
Auckland-a suitcase chhunga ruhro chhar hian ngaihven a hlawh hle a, kum tam tak chhung lo dah tawh nia rin a ni a. Korean police chuan naupang kum sarih leh 10 mi ruhro niin an sawi.
New Zealand chuan an mi man hmeichhia hi an rama thawn turin South Korea an dil mek.
Auckland-a police chuan thla hmasaa a titua rin South Korea-ah a awm nia an hriat hnu khan South Korean thuneitute nen thawhhona tha tak neiin an zawng tih an sawi.
Hmeichhia hi naupangte a thah hnuah hian kum 2018 khan South Korea-ah a tlan lut niin South Korean police chuan an sawi a. Kum 42 mi, New Zealand ram mi, Korean thlah niin an sawi bawk.
Interpol pawhin manna tur thupek a chhuah hial a. Officer-ten Ningani zan khan chhimchhak lama Ulsan khawpuia a apartment an luhchilhnaah an man ta a ni.
Seoul-a National Police agency chuan chhuitute hian a awmna nia ngaih hrilhtu an neih hnuah an luhchilh ta niin a sawi.
Thla hmasa khan New Zealand police chuan naupangte hi tute nge an nih hriat tumin hmeichhia hi nasa takin an lo zawng tawh a, a hming erawh an sawi lo.
“Korean thuneitute leh kan NZ Police Interpol staff thawhhona tha takin hun reilo te chhungin an man ta a ni,” tiin New Zealand Police Detective Inspector Tofilau Fa’amanuia Vaaelua chuan Ningani khan a sawi.
Police chuan bail phal lo tura hma an la a, New Zealand-ah tualthah thubuai siamsak turin hma an la bawk.
Tualchhung chanchinbute chuan a chhungte chu kum tam vak lo liam taah khan Auckland-ah an cheng thin a, naupangte pa hi cancer vangin a thi a. Naupangte pi leh pute erawh New Zealand-ah an la cheng niin an sawi.
Naupangte ruhro hi August thla tir khan chhungkaw pakhatin online-a thil lilamna atanga thil an lei zingah suitcase hranga an lo dah tel atangin an hmu a ni.
Officer-te chuan a hmutu chhungkua hi he thihnaah hian inhnamhnawihna an nei lo va, an thil tawn avang chuan hrehawm an ti em em zawk niin an sawi.