European champion ni lai Real Madrid in hnehna chang turin second half huntawp dawn lama goal hnih khung an mamawh a. Mahse an duh ber result tha erawh nei theiin 2-0 in RB Leipzig an hneh.
Santiago Bernabeu-ah Real Madrid in an mikhualte an hneh avangin an head coach Carlo Ancelotti chuan mellung thar a kai a. Champions League match 100 a hnehna chang thei coach pahnihna a ni.
Italian coach hian vawi 102 hnehna chang Manchester United legend Sir Alex Ferguson chiah a tluk lo.
Europe a vawi 14 champion tawh Los Blancos hi inkhel hun tam zawk chhung beisei pha lo zawk team-ah an tang a. Goal hlauhawm siam hnem zawk chu an mikhualte niin Christopher Nkunku goal khung tur Thibaut Courtois chuan vawi hnih tha takin a dansak.
Minute 80-naah Real Madrid midfielder Federico Valverde chuan goal tha tak a khung a. An khingpuiten huntha an neih an bawhpelh zel chu a tawrh tir.
Huntawp dawn tawhah substitute Marco Asenskio chuan Toni Kroos siamak chu an goal hnihna ni turin a khung ve leh bawk.
Real hian kum 2017-18 season hnuah Champions League a an group match hmasa pahnih a hnehna an chan ve ve vawikhatna a ni. Coach Ancelotti chuan, “Kan kheltha thawkhat. First half-ah harsa kan ti deuh a, second half-ah inkhel thununtu ni chunga na zawka nawr kan duh a, kan duhna kan tihlawhtling.”
“An goal nawr a hlauhawm avangin first half-ah kan fimkhur a tul ve thova, kha vang khan risk kan la ngam bik lo. Second half-ah erawh kan insiamthat kha a tul a ni.” tiin inkhel a thlirlet.
Group F inkhel dangah Ukrainian football club Shakhtar Donetsk in Poland-ah Celtic an mikhual a. 1-1 in an inhnehtawk.
Celtic in inkhel an thunun zanah minute 10-naah Artem Bondarenko own goal hmangin hma an hruai a. Hei hi Mykhailo Mudryk chuan a sut.