National Crime Records Bureau (NCRB)-in a chhinchhiah danin kum 2021 khan India ramah Madhya Pradesh chu kumtlinglo pawngsualna a thlen tamna ber niin vawi 3,259 a thleng.
Maharashtra-in dawtin vawi 2,785 a thleng a. Uttar Pradesh-ah vawi 2,630 a thleng bawk niin Nilainia report an tihchhuahah an tar lang.
Kumtlinglo pawngsual piah lamah hian Madhya Pradesh chu naupangte laka dan bawhchhiatna tamna ber niin vawi 17,008 a thleng niin NCRB chuan a chhinchhiah bawk.
Nau pai tihchhiat luih leh tihtlak tum 17 thlengin a tam berna chu Madhya Pradesh tho a ni a. Tribal hmeichhe pawngsualna thlen tamna ber pawh Madhya Pradesh tho niin vawi 339 a thleng a. Chhattisgarh (195) leh Maharashtra (129) ten an dawt a. Tribal hmeichhe pawngsualna hi kum 2019 aiin 1% chauhvin a thleng tlem bawk.
Madhya Pradesh-ah hian puitling pawngsual erawh a hma aiin a thleng tlem hret ve thung a. Vawi 2,339 a thleng a, India ramah hetiang a tamna ber hi Rajasthan niin vawi 5,310 a thleng a, Uttar Pradesh-ah vawi 2,769 a thleng bawk.
Police-in an chhinchhiah dan chuan naupang bik pawngsual leh an laka pawikhawihna dang thleng hi an chhungte leh anmahni hre chiang taktute tih a tam hle a. “Naupangte hi an inah an him lo hle a, NCRB-in a chhinchhiah dan chuan naupang kumtlinglo 3,189 zet chu anmahni hre chiangtuten an pawngsual a ni a. Hei hi dan leh thupek kenkawhna lama buaina leh a chhiat vang lam a ni lo va, khawtlang nuna harsatna zawk a ni,” tiin police department-a officer hlun tak, a hming tar lan duh lo chuan a sawi.
Hmeichhiate laka pawikhawihna chungchangah hian Additional Director General of Police (ADGP) Pragya Richa Shrivastava chuan, “Hmeichhe naupang bote hmuh let an nih theih nan hian kan bei nasa thin a. Heng hmeichhe kumtlinglo bote hi hmun dangah hruaia pasal neihtir an ni fo thin a, keini chuan pawngsual thubuai kan ziak lut thin a, kan chhanchhuah hnuah a mipa pawh thubuai kan siamsak thin a. Chhanchhuah leh zawng zawng nen kan chhinchhiah avangin a zat pawh a tam phah a ni,” a ti.