Russia-in missile hmangin Ukraine chhim lama Kryvyi Rih khawpui bula tuikhuah an kap tih thuneituten an sawi.
Khawpui hotu, Oleksandr Vilkul chuan a bul hnaia cheng thenkhat chu hmun hima insuan chhuak tura hriattir an ni tih a sawi a; mahse, thil hlauhawm tak erawh a ni lo tih a sawi.
Ukraine chuan he thil hi Russia-in tun hnaia nasa taka an beih letna a chhanna niin a sawi.
Kryvyi Rih-a piang, President Volodymyr Zelensky chuan Karachunivske tuikhuah kah a nih hnuah hian Russia chu ‘mi firfiak ram’ tiin a sawi.
“Civil mite bei duh tawk leka chak lo in ni,” tiin Nilaini zan tlai tawh taka thu a sawiah Zelensky hian a sawi a. “Mi tenawm, indona hmun atanga tlan chhuakte chuan an tih theih apiang an ti hreh lo,” a ti.
Indona atanga tlan chhuak a sawite hi Ukraine-in tun hnaia an ram hmarchhak, Kharkiv region-a an nawr letnaa Russian sipai inhnukdawk a sawina a ni.
Zelensky chuan tuikhuah hi sipai lama engmah hlutna nei lo a nih thu a sawi.
Vilkul chuan Nilaini zan khan vawi hnih thil puak a awm thu leh hei vang hian Inhulets luiah tui tam tak a luan luh phah thu a sawi.
Indona chhuah hmaa mi 6,00,000 chuang chennaah hian indo avangin tui lakna a buai phah hle.
Tuikhuah atang hian tui a luan chhuah nasat avangin lui kuang a liam a, tuiin in thenkhat a chim phah niin thuneituten an sawi.
Ningani tuk khan Vilkul-a hian Inhulets lui tui chim chin a hniam leh hret thu a sawi a, nunna chân an awm lo niin a sawi bawk.
Moscow chuan missile hmanga tuikhuah kah a nih chungchangah hian engmah vantlang hriatin sawi an la nei lo.
A hmain Russian sipaite hian energy siamna hmunte an kah thu leh kartawpah khan Ukraine khawchhak lamah mi maktaduai telin power an nei loh phah.