Aizawl: MPCC President Lalsawta’n, “Tang puihna hmangin he ram hi mi taimate leh thawkrimte hlawhtlinna ramah kan siam dawn,” a ti a. Tan nachang hre lote pawh tang tura zirtiria fuihin an kaihruai dawn niin a sawi.
BRC Hall, Darlawn-a Congress Party Workers’ Meet nimina neih a hmanpuinaah he thu hi MPCC president chuan a sawi.
“Taksa leh rilru lama harsatna nei, tang tura beisei theih lohte pawh an harsatna ngaihtuahpuiin, damdawi leh inenkawlna bakah an fate zirna thlenga buaipuisak an ni ang,” a ti.
Lalsawta chuan, “India ram state thenkhata thil thleng mek kan hmuhin Mizoram hi chhan tlak a la ni,” tiin, dik lo taka sum la lutten sum siam belh an duh avangin sorkara mi pawimawh, minister leh MLA nih an tum tan niin a sawi a. “Hetiang mite hian sorkar hi sum siamna khawl ang lekah ngaiin MLA leh minister an nih theih nan inthlan dawnah lei tumin an rawn bei dawn che u, in vote lei tumtute hian nangmahni zawk kha a ni lei an tum chu. Hetiang mite hi lo hnawl ula, lo tizak rawh u. Sorkar pawisa kan tih hi mipui chhiah pek tlingkhawm a ni,” a ti.
MPCC president chuan, “Pencil kan lei pawhin sorkarah chhiah kan pe zel,” tiin, “Hmannia car thar man to tak an lei pawh kha mipui chhiah pek tlingkhawma an lei a ni,” a ti a. “Kan chhiah pek tlingkhawm hmanga kan vote lei tumtute hi kan hnawl a ngai a ni,” tiin MLA candidate-te tihautak lo turin kalkhawmte chu a chah bawk.