YMA, Chaltlang Branch, Aizawlin an kum 75 tlin denchhena an thlanmuala ruang vawn thatna hmun (refrigerated mortuary) an siam chu nimin khan bialtu MLA Vanlalhlana’n a hawng.
YMA, Chaltlang Branch hruaitute chuan ruang vawn thatna hian chhiat tawk chhungte, hmun hla zawka awmten ruang an hmuh hman hmaa loh theih lohna avanga invui ngai thin a tihtlem an beisei thu leh chhiat ni inkaihhruaina pawh an her rem thu an sawi.
Ruang pahnih vawn that theihna khawl hi Eskay Refrigeration, Guwahati atangin an lei a, tax leh a thawnna/phurhna man nen a vaiin Rs. 1,94,700 an seng niin an sawi.
Ruang dahna ft 7-a sei niin, inchi 30-a zau, inchi 49-a sang ni a. Ruang vawn thatna khawl leina atan bialtu MLA Vanlalhlana’n MLA fund atangin Rs. nuai 2 a pe a, a dahna room siamna senso atan Vanlalngaihsaka (IAS) te chhungin an fanu. Vanlalchhandami hriatreng nan Rs 70,000 an thawh bawk.
YMA, Chaltlang Branch hruaitute chuan chhiat tawk an awm changa hmun danga awm mitthi chhung te, a tuk maia lo thlenga lungdam taka inthlah thei mai tur, ruang vawn thatna a awm loh avanga lungdam lo taka invui ngai thin tihbo dan an lo ngaihtuah thin tawh thu an sawi a. Kumina an branch kum 75-na denchhena ruang vawn thatna hmun (refrigerated mortuary) siam tura thutlukna siama hma la zui ta an nih thu an sawi.
Veng chhung mitthi lumen ngai, ruang kil hrehawm tawh (ruang chhe tawh, vui nghal ngai ang chi huam lovin) an awmin emaw, mitthi chhungte nghah rei ngai deuh an awmin ruang vawn thatna hi ni/zan thum chhung a thlawnin an hmang thei dawn a, veng pawn lam tan pawh man chawia hman theih dan tur ruahmanna an siam bawk.