BJP, Mizoram State President Vanlalhmuaka’n “Missionary nuai khat tirh chhuah aiin Mizorama chhungkaw nuai khat dinchhuahtir a tha zawk,” a ti.
BJP political session nimina neihah he thu hi BJP, Mizoram state president chuan a sawi a. “Tih tur sawi teuha tih leh si loh hi engmah a ni lo tih kan ram hian hre thar leh ang u,” tiin, Mizoram leh Mizo hnam dinchhuahna tur tak tak ngaihtuah a tul tawh thu a sawi.
Vanlalhmuaka chuan, “BJP ni lo sorkar kan thlang lui leh tlat a nih chuan Mizoram hi a hnungtawlh zawngin kan kal zel dawn tih a lang a ni,” a ti a. “Kan ram hian hruaitu tha, ram hmangaih tak tak, ngaihtuahna seng tak taktu kan mamawh tawh hle a ni,” a ti.
BJP, Mizoram president chuan Mizoram sorkarin union minister hnenah PMAY atangin 40% siam zo tawh ang leh la zawh loh za-a 60% chu thla hnih hnua zo tur angin an report nia sawiin, “Kum li chhunga 40% chauh zo thei hian thla hnih chhunga 60% zawh chu union minister khan a ring lo hle,” a ti a. “BJP-in sorkarna kan chang a nih chuan thingtlang mi, PMAY atanga in sak tanpuina la dawng lote hnenah thla ruk chhungin PMAY atangin in kan saksak dawn a, in sakna tur sum tichingpente erawh chuan an tihsual man an tawrh ngei theih nan CBI kan chhuitir dawn a ni,” a ti bawk.