Nigerian hmeichhia, kum 30 mi chu Delhi-ah monkeypox a kai tih hmuh chhuah niin ram khawpui bera he natna vei pariat hmuhna a ni ta a, India-ah mi 13-in an vei tih hmuhna a ni bawk.
Lok Nayak Jai Prakash Narayan (LNJP) Hospital-ah dah nghal a ni.
Press Trust of India chuan Delhi-ah vek hian mi pakhat, monkeypox vei nia rinhlelh chu sorkar damdawi inah dah a ni bawk.
“Delhi-ah monkeypox vei mi pariat hmuh a ni tawh a. A thar ber hi Nigerian hmeichia, kum 30 mi niin LNJP Hospital-ah dah luh a ni a, a dinhmun thlithlai reng a ni,” tiin sawi a ni.
Rinhlelh pakhat pawh hi Nigerian hmeichhia tho a ni a, September 14 khan damdawi inah dah luh an ni a. Hri kai pasarihna leh pariatna hi damdawi inah enkawl mek ve ve an la ni a, “Rinhlelh kai nen hian an pathum hian an dinhmun a tha vek,” an ti a. A vei mi pariat zingah hian mipa pathum an tel.
A vei hmuh chhuah hmasak paruk chu enkawl dam an ni tawh tih doctor-in a sawi.
Monkeypox hi ramsa atanga kai darh niin khawsik, vun bawl, khaw hmuh fiah lo, lu na, tihrawl rawl, thlan tla nasa, vawt, hrawk thip leh khuh an ni tlangpui.
LNJP leh Indian Council of Medical Research (ICMR)-in tun hnaia a zir chiannaah a vei mi paknga chuan khawsik sang vak lo, tihrawlh na, an serh, kap, malbul vela bawl an nei.
Monkeypox hi mipat hmeichhiatna hman atanga inkai chhawn a ni deuh ber niin an sawi bawk.
Delhi-ah hian a vei hmuh hmasak ber chu July 24 kha a ni.
LNJP Hospital ho sorkar laipuiin he hri kai enkawlna tur bika a ruahman a ni.