Real Madrid leh Bayern Munich attacking midfielder hlui James Rodríguez chuan Greek club Olympiakos a zawm.
Kum 31 mi hian Ningani khan a club thar hi a zawm fel a. Real Madrid tana a khelhpui thin Marcelo hnung zuiin Greek champion hi tun nipuiah a zawm.
James hian Qatari club Al-Rayyan atangin a club thar hi a zawm a. A contract leh insawn dan kimchang erawh puanzar a ni lo.
Colombia tana vawi 86 inkhel a goal 24 khung tawh James hian kum 11 chhung European football-ah hun a hmang tawh a. Ram tana a hlawhtlinnate club football-ah mimal chetthat lamah a chhunzawm theih loh leh thin chu amah sawiselna a ni thin.
Heti chung hian FC Porto-ah league title vawi thum a la hman a, Europa League a chawi tawh bawk.
Real Madrid-ah league title vawi hnih chawi thei squad-ah a tel a, UEFA champions League vawi hnih chawi zingah a tel bawk a. Bayern Munich tan Bundesliga title vawi hnih a la tawh.