Aizawl: MPCC President Lalsawta’n, “Hnam tinin ram leh mipui kan nei vek a, heng thil pahnih enkawl tha apiang hian ram ralmuang, him leh hausa an siam thin,” a ti.
MZU-ah political talk-ah nimin khan he thu hi MPCC president chuan a sawi a. Environment humhalh leh mihring rilru leh nunphung a tha zawnga hruai pawh ram leh hnam hmasawnna atan a pawimawh thu a sawi.
Lalsawta chuan, “Hmasawn kan duh avang hian kan environment hi a chhe kher tur a ni lo,” tiin environment humhalh chunga hmasawnna chu kalpui tur a nih thu a sawi a. “Chutiang bawkin kan chhungril nun a chhiat miau chuan hma sawn eng ang mah ila awmzia a awm chuang lo,” tiin, mihring rilru leh nunphung siam that chu ram hruaituten an tum ngei ngei tur a nih thu a sawi bawk.
Hmasawn turin sorkar tha (good governance), dan rorelna (rule of law) a pawimawh tih sawiin, Lalsawta chuan, “Rom sorkar, Nero-a rorel lai chuan Nero-a rilru ang ang kha dan a ni ringawt a, a kutzungpui tihpir leh tihpir loh azirin gladiator-te an thi a, an nung mai thin, chu chu ‘rule of thumb’ an ti,” tiin, “Bihar-ah Laloo-a rorelna hnuaiah dan rorelna (rule of law) a awm lo va, Nitish Kumar-a hnuaiah chuan dan ang taka rorelna awmin nasa takin hma an sawn phah a ni,” a ti.
Lalsawta chuan, “Ram hmasawnna atan management, inenkawlna tha a pawimawh ber,” tiin ram hmasawn leh hmasawn lo pawh management that leh that loh vang a nih thu a sawi a. “Mipui hi chhiah petu kan ni a, sorkar chu kan chhiah pek tlingkhawm hmanga hmasawnna hnathawktu a ni thung. Mipuiin chhiah kan pek tlingkhawm hmanga sorkar inenkawl dan hi ngun taka kan vil a pawimawh,” a ti bawk a ni.