Mizoram Premier League champion lai Aizawl FC in squad tha tak an neih an chhawr zel a. Tun season Zote Honda Mizoram Premier League Season 9-ah match thum atangin an khingpuite an la hneh vek.
Zirtawpni a Rajiv Gandhi Stadium a inkhelah Aizawl FC hian 1-0 in table mawngphah a awm Electric Veng FC an hneh a. Minute 90 chhung inkhelah a chungnung zawkah an tang a, mahse Electric Veng goalkeeper C. Vanlalhriata chuan goal an khung nual tur a dansak.
Hriata hian first half-ah MS Dawngliana leh K. Lalrinfela te lakah save a siam a, second half-ah Dawngtea goal khung tur a dansak leh bawk a. Mahse minute 35-na a K. Lalhmangaihkima goal khung tur erawh a dang thei lo.
Inkhel hmasa zawkah Chhinga Veng FC leh FC Venghnuai te inkhelin 1-1 in an inhnehtawk.
Chhinga Veng in Lalnunsiama own goal hmangin hma an hruai a. Hei hi minute hnih hnu lekah C Ngurnuntluanga hmangin Venghnuai in an sut.
Venghnuai captain Vanlalthanga a inthunun zo lo leh thin a, second half-ah hlauhawm taka foul a neih avangin hnawhchhuah a ni.