Pachhunga University College-a Asst. Prof. Lalthlamuana Ralte-in, “Ram hmangaihna dik tak chu hnam venhimah a innghat a. Awpbehna lak ata zalen tura hmalakte hi nationalism a ni,” a ti.
MNF party chhung inkhawm nimina neihah he thu hi Lalthlamuana Ralte chuan a sawi a. “Sapho min awp lai chuan kan hnam himna pawh an kutah a awm a, India hnuaia kan awm hnu ah erawh kan himna chu keimahni kutah a innghat,” tiin, “Kan himna turin keimahni, ram hruaitute an pawimawh,” a ti.
Lalthlamuana Ralte chuan Israel leh Japanese-te atanga nationalism zirchiang lehzual turin kalkhawmte chu a ngen a. Israel chu kum 1948-ah UNO-in ram a pe a, an ram neih chu engti zawng maha chãn an tum tawh lo tih sawiin, an ram himna tura huaisen taka an beih thu a sawi.
Japanese nationalism-in a tum ber chu sumdawnna leh eizawnna hmanga khawvel awp a nih thu sawiin Lalthlamuana Ralte chuan, “An taima, an thawkrim, an hlawhtling reng a ni,” a ti a. Chimralna leh hmelma laka himna turin Israel nationalism, ram humhim duhna leh hmangaihna neih tel zir a tul sawiin, Mizoram thenawm Cachari-te chu Cachar ram la awm mah se chimralin an awm tawh tih a sawi.
Lalthlamuana Ralte chuan hnam indin thar lehna tura pawimawh chu political party-te an nih thu sawiin, “Judaho chuan an vahvaihna hmun ram hrang hrangah an hnam leh sakhua an vawng nung tlat a, 1948-ah an ram ngaih em emah ram an din thar leh a ni,” tiin, “He ram hi Pathianin kan tana a dah a ni a, kan pi pute sahzau ramah kan awm a, he ram hi kan thlahtuten huaisen taka an neih a ni, kan pasalthate thisen luanna ram kan chhawm zel hi a hlu a, hnam khat, tawng khat hmanga inbe thei kan ni leh zel hi a ropui,” a ti. “Sorkar laipuiin dan chi hrang hrang min barh luih thut thut lai hian kan inven a ngai,” Lalthlamuana Ralte chuan a ti bawk.