Mizoram leh Assam chief minister-te chu a tum hnih nan New Delhi-ah Thawhtanni hian ramri buaina chungchangah an inbe leh dawn.
Thudawn danin Zirtawpniah Mizoram Chief Minister Zoramthange leh Assam Chief Minister Himanta Biswa te chu phone hmanga inbiain ramri chungchangah September 19, 2022 (Thawhtanni)-ah New Delhi-a inbe turin thu an titlu a ni.
State pahnih chief minister-te hi August 10 khan telephone hmangin an lo inbe tawh a, hemi tum hian September thla tira inbiak an lo rem ti dun tawh a ni.
Nikum November thla khan Union Home Minister Amit Shah hoin Delhi-ah an lo inkawm tawh a, ramri chungchang chin fel a nih theih nan hma laa chief ministerial level-a inbiak an lo rem ti tawh a ni.
Nikum July 26-a Vairengte daia state pahnih police-te an inkah hnu, August 5, 2021 khan Assam sorkarin an minister pahnih Mizoramah tirin Mizoram sorkar aiawhin minister pahnihte nen an inbia a, kum khat hnu, August 9, 2022 khan minister pahnih ve ve hi Aizawlah bawk an inbe leh.
Kumina inbiakna an neih khan state pahnih sorkar aiawhte chuan October thlaah state level inbiak an rem ti dun a ni.