Pakistan-a damdawi hotute chuan tun hnaia tui lian rapthlak tak an tawrh hnuah hriselna tichhe thei thil hrang hrang a inmung zui dawn niin an sawi.
June thla laihawl atanga tui lian an tawrh khan mi maktaduai 33 vel tibuaiin mi 1,500 dawn an thi bawk.
Hmun thenkhatah chuan chhanchhuah leh hmun hima insuan hna thawh mek zel a ni a, hetih lai hian hriselna lama mi thiamte chuan dengue, malaria leh pum lam fel lo an pung mek tih an sawi.
Chenna in chhuahsana tlanchhiate hi tui tlinna bul maiah an khawsa hlawm a. Dengue vanga thi an awm nual tawh a, a vei pawh an pung chak hle.
Chhim lam, Sindh province-a damdawi thuneitute chuan dengue vei mi 3,830 an awm tawh thu leh mi pakua an thih tawh thu an sawi a; a zat hi hei aia tam daih a nih an ring.
“A pum puia thlirin Sindh dinhmun hi a tha lo va, province pumah medical camp kan buatsaih a. Malaria vei nia hriat tam zawk hi dengue vei zawk niin kan hria a, a vil pawh theihtawpin kan vil,” tiin Pakistan Medical Association-a secretary general, Dr Abdul Ghafoor Shoro chuan BBC a hrilh.
“Dengue hi province pumah buaipui tham a ni a, ni tin a vei an pung zel a. Laboratory-a kan endik chinah kan rinhlelh zinga 80% zet chuan an vei,” a ti.
Karachi-a Agha Khan Hospital-a dengue veite enkawltu ber, Dr Shoro chuan chawlhkar an la hmabak zelah he natna hi a vei an pun lehzual ngei a rinawm hle niin a sawi.
Thla hnih chuang tui lianin a tihbuai hnuah Pakistan-ah hian hmun thenkhat chu an buai a la reh lo va, khaw tam tak tuiin la chimin chhungkaw tam tak hmun himah an insawn chhuah a ngai.
Hmun kilkhawr deuh phei chu tuiin kawng a tihchhiat avangin tlawhpawh theih an la ni lo va, mi tam tak chu an khaw thlen theih tawpa mobile van panin an kal vang vang a ngai thin.