Barcelona striker Robert Lewandowski chuan a club thar tan a hna ngai a chhunzawm a. Goal khung belh zelin Catalan club a chakpui.
Inrinni a La Liga inkhelah Barca hian Camp Nou-ah Elche an mikhual a. Polish striker in goal hnih a khung bakah Memphis Depay chuan goal khat dang khungin 3-0 in an chak.
An khingpuite hi league table mawngphah a awm an ni a, minute 14-naah Elche centre-back Gonzalo Verdu chu hnawhchhuah a nih bawk avangin Barcelona tan chak turin harsatna lian a awm lo.
Minute 34-naah Lewandowski-a’n an goal hmahruai a khung a. Rawlthar left-back Alejandro Balde siamsak atang goal khungin La Liga-ah a zawnin game nga chhung goal a khung tawh.
Dutch forward Memphis-a’n minute 41-naah goal mawi a khung chhunzawm a. Lewandowski bawkin second half tan tir lamah an goal thumna khung lehin he goal khung tur hian Memphis-a thawhrimna hmuh hmaih a thiang lo.
Barcelona coach Xavi chuan, “Elche kha goal ven tum taka inrem an ni chungin an lakah ball kan hloh hnem hrim hrim. Mahse a tawpah erawh kan beisei aia inkhel awlsam a ni a, player 11 nise chuan inkhel a danglam hle ang. Red card zawhah chuan kan tam zawk avangin danglamna a tam lo thei lo.” a ti.