Darkar 12 lek chhungin, Tripura-a Tripura Congress president Pijush Biswas leh CPI(M) MP Jharna Das Baidya-a chenna in chu mi tute nge an nih hriat lohten an bei.
Tripura Congress president Biswas hi Pathianni tuk khan Sepahijala district-a Bishalgarh-ah a lirtheia a chuang lai beih a ni a. BJP mi leh sate tihah a puh.
Congress worker thenkhat pawhin hliam an tuar niin a sawi bawk.
He thil thlen hnu lawk, chawhnu lamah state khawpui, Agartala-ah party hruaitu beihna dang a thleng leh.
Rajya Sabha MP leh CPI (M) hruaitu, Matripalli venga Baidya-a chenna in chu tute nge an nih hriat lohten an bei.
Democratic Youth Federation of India (DYFI) leh Students’ Federation of India (SFI) tangdun chuan Pathianni khan Badhargaht-ah kawng zawh an huaihawt.
Zirlai leh thalai pawl zinga tel thenkhatte hi Badhatghat CPI(M) office tualah an pungkhawm nghe nghe.
Kawng zawh an tan deuh chiah tihah DYFI leh SFI member-te hi miin an bei bawk.
DYFI state president Palash Bhowmik chuan he thilah hian an pawla mi 10-12 velin hliam an tuar niin a sawi a. Tharuma beihna an tawh avang hian kawng zawh pawh an thulh zui nghal tih a sawi bawk.
He thil thlen lai hian MP Baidya pawh a tel.
BJP mi leh saten amah beih an tum niin a hnuah an sawi a, amah vengtute avang chauhvin an khawih lo niin a sawi a. Kawng zawh an thulh leh tak avang hian inah a haw tih a sawi bawk.
Baidya chuan, “Biker 30-40 velin ka in an suasam,” a ti.
CPI(M) Dukli subdivision office pawh Pathianniah vek khan beih leh suasam a ni bawk.
CPI(M) worker pahnihin kut an tuar a, bike pahnih leh car an tichhe bawk.
Left thlawp zirlai pawl leh thalai pawl thenkhatin hetianga inbeihna thleng an duh lohna hi Agartala-ah an lantir a.
Sub-divisional police officer (SDPO) chuan thil thleng an hriat veleh an tlan nghal tih a sawi.
Heng thil thleng hi police chuan an chhui zui nghal mek.
Tripura Congress chuan nimin khan an party chief beihna tawh an duh lohzia leh an demna tihlan nan darkar 12 awh bandh an huaihawt nghal.