Aizawl: ICT Minister Robert Romawia Royte-in kar kalta khan IT leh E-Governance lama hmasawnna liantham thlentir thei tur, Digital Mizoram Project Rs. nuai 40,000 man chu Delhi-ah MEITY Ministry-a official-te a sawipui.
Robert Romawia chuan Mizoram chu hmun fianrial, kawng leh thlawhna hmanga kalpawhna that tawk lohna a nih avangin India ram hmun dang aia digital connectivity mamawh nasa bik a nih avangin Rs. nuai 40,000 senna tur project chu sanction ran a nih theihna tura finance Ministry-ah recommendation pe rang turin a ngen a. NeGD President & Addl Secretary Abhisek Singh chuan Mizoram project chu tha thawkhat nia sawiin, sanction vat a nih theihna tura an tih tur an tih zawh vat tur thu ICT Minister chu a lo hrilh niin sorkar thuchhuahin a tar lang.
Ministry hrang hranga hotute pawh Robert Romawia chuan PMJVK chungchangte a sawipui a. Mizoram district pathum chauh tuam thin PMJVK scheme-in Mizorama district 11 a tuam kim tur lawmawm a tih thu hrilhin, instalment thenkhat release tura Mizoram sorkar rawtna pawh thehlutin hun reilote chhunga Rs. nuai 10,200 release an tum thu an lo hrilh niin sorkar thuchuah chuan a tar lang a. Sum hman chak dan azirin a dang pawh an release zel tur thu an lo hrilh niin a tar lang bawk.
Sports minister ni bawk, Robert Romawia chuan REC Chairman & CMD Vivek Kumar Singh pawh kawmin, Motorsports Racing tract atana Rs. nuai 700 an CSR fund atanga Mizoram an pek avanga lawmthu hrilhin, hnathawh mek dan a hrilh a. CSR atanga sanction tura tourist bus pathum leh tourist car pakhat an dil pawh tifel thuai turin a ngen.
Tourism minister ni bawk, Robert Romawia chuan Ministry of Tourism-a senior officer-te pawh hmuin Mizoram tana PRASAD projects sanction ran dan tur te, Ministry of Tourism-in Swadesh Darshan sum a pek chhuah ran dan tur te, Mizorama Golf Tournament siam dan tur leh Mizorama tourism inhawmpui lian, International Tourism Mart (ITM) hlawhtling taka neih dan turte an sawiho bawk a ni.