European Union president chuan Russia-in Ukraine a rûn chungchangah an chet dan hrang hrangah khawvel huap rorelna inrawlh ngei se a duh thu a sawi.
A inchhawka president chanvo chelh kual thina chelh mektu, Czech Republic chuan tun hnaia Ukrainian sipaiten an lak, Izyum bula thlan tam tak hai chhuah chungchang a sawi a ni.
Thlanmual hai chhuaha phumte hi tam tak civil mi, hmeichhia leh naupang pawh tel nualna niin an sawi.
Czech Foreign Minister Jan Lipavsky chuan, “Indonaa dan pela che hremna turah chuan nghet takin kan ding a ni,” a ti.
Ukraine chuan thlan hai chhuah hi indona dan bawhchhiatna ni ngeia an ngaih thu an sawi a. Izyum khaw dai ramhnuaia thlanmualah hian ruang 59 phawrh tawh a ni a, a dang tam tak phawrh hmabak la awm tura ngaih a ni.
“Kum zabi 21-na tawha hetianga civil mite laka rawng taka chetna hi ngaihtuah phak loh thil leh rawng lutuk a ni,” tiin Lipavsky chuan a sawi.
“Kan ngaichang reng dawn a, hremna pek chu kan duh dan nghet tak a ni,” a ti.
“He pawikhawihna thlengah hian a titu hremna turin rang taka ngaihtuah thei tur special international tribunal din kan duh,” a ti bawk.
A tih thin dana Inrinna tlaia thu a sawiah Ukrainian President Volodymyr Zelensky chuan chhuituten Kharkiv region-a Izyum-a chengte sawisak an ni ngei tih finfiahna thar an hmu niin a sawi.
“Kharkiv region-a khawpui leh khaw hrang hrangah insawisakna hmun (torture chamber) 10 zet hai chhuah tawh a ni,” a ti.
Zelensky-a chuan Russian-te hian ‘indona mual leh court pindanah chhanna’ an pek ngei a ngai tih a sawi.
Ningani khan EU Commission President chief Ursula von der Leyen chuan Russian President Vladimir Putin-a chuan Ukraine a rûnnaa indo dan a bawhchhiat avangin International Criminal Court-ah thubuai siamsak ngei a duh thu a lo sawi tawh.
Russia hian Ukraine an rûn mek hi Nazi ang maia awmte an beihna nia sawiin indona leh inrûnna ang pawhin an sawi duh lo va, ‘a bik taka sipai beihpui thlakna’ ti hlirin an sawi.
Izyum-a thlanmual hai chhuah chungchang hi sawi engmah an la nei lo va. A hma erawh chuan Moscow hian civil mi an beih ngai loh thu an lo sawi tawh thung.