- Lalhminghlua Nkb
Kum 2004 atangin Mobile phone chuan Mizoram min luhchilh ve tan a nih kha. Khatiang hunlaia mobile phone nei pha mai ni lo, a awrha awrh pha chinte kan ngaihsan theih zia kha. Zaithiam pakhat phei chuan a concert-na hmuna a zai lai takin a cell phone kha a han hmang ngei a. Khami han hmuh phei kha chuan, kha zaithiam pa kha kan ngaisang bawk nen, a cell phone ang han neih ve chakna khan min tur ut ut a ni ber mai!!
Kum 2007 vel a rawn herchhuak a, kan awh leh neih chak em em, kan neih phak ve pawha kan ngaih loh hial zawk mah kha mitin maiin kan hum ta fur mai a ni. Khatiang hunlai kha chuan Sim Card pawh kha a la hlu vet vet hle. Zaithiam intihsiakna leh eng emaw intihsiaknaahte khan Sim Card nung sa han dawn kha lawmman hlu tak a la ni. Sim Card kha a leina pawisa nei nazawng tan lei theih a ni lo, handset nei tawh si, sim card erawh nei lo kha kan kat nuk reng a ni. Sim card nei thei lawk lo mah ila thiante nena Brick Games khelh inchuh thin fo tan kha chuan sim card tel lova handset han hum ve hrim hrim kha chu a rukte hian, tuma hriat loh hian kan hlim veng veng ve tho a nih kha, kan hlim mai a ni lo kan intithei tel bawk hial a ni. Sim Card neih harsat lai khan MZP unau lampangte kha an va awhawm zual thin tak! Anni kha chuan BSNL dawr dan kha an thiam riau zel nge maw ni?
Hun a han kal ta zel a, handset man to tak tak a rawn chhuak ta chuah chuah mai le. A nei fain handset tha pui pui leh to tak tak man an rawn nei ta fer fur mai, handset man to hum theih chu inelna leh rualpawlna chikhat emaw tih mai tur a ni. Handset man to nei theite chu kan dah san miau avangin neih chakin kan phe ta suau suau mai. Mizo mithiam leh mipuitlingte thusawi leh thuziak chhiara ngaihthlakin handset man to uar loh tur leh nei lo tura infuihna a nasa hle thin a nih kha.
Handset man to nei kher lo tura infuihna vel pawh chhuilet chuan kum 15 vel a lo liam ta reng mai. Kum 15 hnuah meuh chuan thil a danglam ta, handset man to nei lo tura thusawi leh thuziak pawh chhiara ngaihthlak tur a awm ta lo. A nei changkang kangte chu mi awhawm an ni ta mai emaw tih tur a ni. Hei tunah khawvel pum huapa phone lar leh tha iPhone 14 a rawn chhuak leh ta ruau ruau mai. A nei hmasa sa vanneiah kan ngai ta mai a nih tak hi. Hmana handset man to neih tha ti lo zingah pawh iPhone hum an awm ta fur mai chu a nih hi.
Handset man to chungchang chu kum 15 hnuah chuan tu’n kan buaipui peih ta lo. Tunlai hian MHIP lam chuan Social Media-ah sexy taka awm lo turin an hnampui hmeichhiate tan thu an chhuah a nih tak hi. Chutiangin Mizo mipui nawlpuiin mahni anpui kawp chung chang kan sawi luih luih reng bawk a ni. Hengte hi tun atanga kum 15 hnu velah kan la sawi luih luih peih kher ang em le?
Engpawh nise thalaite chuan iPhone hum thei chu tute pawh nise kan ensang tho tho zel chu a nih hi. Hum thei turin sum neih a ngai tlat a lawm!! Mizo hmeichhia Social Media-a che sexy tak tak te leh mahni anpui kawpte pawh hi tuna kan endan hi chuan kan en reng lo maithei; an bank account-a cheng nuai tel, cheng maktaduai tel an awm tir reng theih chuan. He khawvel hi sum ngah apiangten hmun lailum tha tha an luahna khawvel a ni tlat si a. Sap rama che sexy thei tak tak te, mahni anpui kawpte khu tu’n an chhaih nawmnah ngam lo, Millionaire an nih miau chuan!! Sap ram chang a ni lo, Mizoramah kum 2020 hnu lamah meuh chuan Pathian awm ring lo (Atheist) te pawh kan thalaite ngaihsan rawn an nih tak hi!! Zofa harh rawh, khua a la tlai lo, ni a la sang chhe lo e.