- R. Vanramchhuanga, Ramhlun Vengthar
Pu NARENDRA DAMODARDAS MODI hi 17th September, 1950 –ah Bombay state, kum 1960 atanga Gujarat state lo ni ta, Mehsana district, Vadnagar khuaah a piang a. An unau paruk zingah a pathumna a ni. A pa chu Damodardas Mulchanddas Modi (1915-1989) a ni a, a nu chu Hiraben Damodardas Modi (1920- )a ni. Hindu sakhaw zuitu niin hnam hnufual Other Backward Class (OBC) an tih chhungkua atanga lo piang a ni.
Modi hian a naupan laiin Vadnagar Rail Station-ah thingpui dawrah a pa a pui thin a, chu mi hnuah a u nen bus station bulah thingpui dawr an hawng ve. India – Pakistan War 1965 lai te khan an awmna bul Rail Station-a sipai an lo thlenin thingpui tui tak mai, hot masala chai, a lo pe thin. School naupang a nih laiin lemchan lamah a inhmang a, kum 13 mi chauh a nih laiin an school bang chhia siamna tur sum tuak nan drama changtuah a tang a ni. Zirna lamah chuan kum 1983-ah M.A (Political Science)Gujarat University atangin First-ah a passed.
Modi hian kum 1970 chho ah khan Rashtriya Swayamsevak Sangh (RSS) pawl a zawm ve a, an chenna chheh vel bialah zirlai pawl Akhil Bharatiya Vidhyarthi a din a, a lar telh telh a, a politics zin kawng pawimawh tak a ni ta a. Kum 1987-ah Bharatiya Janata Party (BJP) a zawm a, kum khat hnuah Gujarat state BJP General Secretary-ah ruat a ni a. A hmalakna avangin BJP party a thangduang ta hle a, 1995 March thlaah India ram state BJP thuneihna sorkar hmasa ber a ding ta a, mahse a ding rei lo, 1996 September thleng chauh a ding.
October, 2001 ah Gujarat Chief Minister, Kesubhai Patel a ban avangin a ai awh turin Modi chu ruat a ni a. MLA a nih hmain Chief Minister atan 7th, October 2001-ah lak luh a ni a, dt.24 February 2002-ah MLA atan by-election-ah thlan tlin a ni a; by-election bakah vawi thum lai MLA atan thlan tlin a ni a, kum 2001 atangin 2014 thleng, tum li a zawnin Chief Minister a ni a, a vawi lina erawh India ram General Election-ah BJP Prime Ministerial candidate a nih avangin a bansan ta a ni. Gujarat state a din atanga Chief Minister ni rei ber a ni.
Kum 2014-ah Lok Sabha election chu a hmachhawn ta a, Varanasi bial atangin a khingpui vote 5.70lakhs zeta hnehin thlan tlin a ni a, dt 26.05.2014 khan India ram Prime Minister 18-na atan lak luh a ni. India ram Independent hnua piang, Prime Minister hmasa ber a ni a; prime minister atana lak luh a nih laia hringtu nu damlai awm chhun a ni bawk. 2019 General Election-ah M.P atan thlan tlin a ni leh ta a, dt.30 May, 2019 khan Prime Minister atan thu tiam tira lak luh a ni leh ta a, tunah hian a term hnihna chu a hmang mek a ni.
Pu Narendra Modi hi MLA atan thlan a nih hmasak bera Chief Minister ni thei a ni a, M.P a nih hmasak ber tumah Prime Minister a ni bawk. He tiang mi hi India ramah mi dang an la awm lo. Chawimawina a dawn tam tak zingah tlemte han sawi lang ila: India Today Magazine-in “The Best Chief Minister in the Country Award” 2007 chu a pe a; 2009 khan FDI Magazine-in “The Asian Winner of the FDI Personality of the Year Award” hlan a ni bawk. The Gallup International Association-in khawvel mi ropui a thlan chhuah zingah Prime Minister Modi chu “3rd Top Leader of the World” Award a hlan. Kum 2018 khan United Nation’s Highest Environmental Award hlan a ni a, Seoul Peace Prize hlan a ni bawk.
Pu Narendra Modi hi hnam hnuaihnung OBC chhungkua atanga sei lian a nih avangin mi rethei dinhmun a hre chiang a. A thupui ber chu ‘Sabka Sath Sabka Vikas’, mi zawng zawng tana hmasawnna, tih hi a ni. Hna a thawk nasa hle a, ni khat, darkar 24 chhungin darkar 16 chhung hna a thawk thin an ti. Mipui hmasawnna atan Economic Welfare Schemes leh Development Scheme za tam tak a siam chhuak a. Sheme thenkhat chu mimal leh company ten an thawh tur a nih laiin thenkhat chu sorkarin a thawh sak tur a ni. Schemes –te hi category pathumah then a ni: Core of Core Schemes, Core Schemes leh Major Central Sector Schemes te an ni.
Prime Minister Schemes tam tak zinga Mizorama kan hman lar deuh tlem han sawi ila: PMAY-mahni chenna tur in sakna tur nei lote sak sak; Jan Dhan Yojana- bank account nei lo crore 15 chuang accont hawntirin debit card crore 10 chuang pek chhuah a ni; Direct Benefit Transfer- pawisa eiruk dona hmanrua a ni; PM Ujjwala Scheme- BPL chhungkua, gas connection nei thei lo tan a thlawnin connection pek an ni; Swachh Bharat Mission-khawpui leh thingtlang khua tihfai hna; Har Ghar Jal- chhung tinin tui chawi ngai lo va tui herh haw theih tura hmalak; Atal Pension Scheme- sawrkar hna thawk ve lo tana pension scheme; Smart City Plan; Pandi Deendayal Upadhyaya Gram Jyoti Yojana- khaw tina electric eng pek; PM Mudra Yojna; PM Garib Kalyan Anna PM Mudra Yojna; PM Garib Kalyan Anna Yojana- mi rethei zual 80 crores te hnenah buhfai thla tin a thlawna sem. Hengte hi scheme za chuang fe atanga entirna tlemte mai a ni.
Vantlang thatna Welfare Scheme bakah India ram tana thil pawimawh tak tak sawi tur tam tak a awm. Chung zingah chuan a langsar zual deuh sawi ila. Demonetisation- corruption leh militants-ho dona hmanrua atana 500 leh 1000 note tih thih; GST-Modi sawrkar-in GST a siam kha India ram independent hnua tax reform lian ber a ni; Jammu and Kashmir state inhung bikna dan India Constitution Art.370 nuai bo hi Modi sawrkar thil tih ropui tak a ni; Pakistan, Bangladesh leh Afghanistan ram atanga Non-Muslim raltlante hnena citizenship pek theihna tura dan siam Citizenship Amendment Act (CAA) te; Muslim nu, an pasal ten awlsam taka an mak thin tih bona dan Muslim Women(Protection of Rights on Marriaage) Act, 2019.
India ram Prime Minister 14-na Pu Modi hi mi danglam tak a ni. Amah hringtu Pi Hiraben Modi, kum 82 mi hi a zah thiam hle a, a hnen atangin malsawmna a dil thin an ti. Khawvel pum huapin hripui Covid 19 a leng a, India ram mihring crore 140 lai enkawl hna kha a namai lo. USA-ah mihring crore 33 awmah 10lakhs an thih laiin, India mi covid avanga thi 5lakhs chauh kan awm hian Modi ropuizia kan hre thei. India mipui hnenah covid vaccine a thlawn vekin min pe hi thil ropui tak a ni.
Mi hnuaihnung leh mipui vantlang tan chauh a thawk a ni lo va, India ram ropuina hi a sang tual tual a ni. Make in India schme avangin Industry lam a thangduang a, defence lam ngaihtuahna avangin raldona hmanrua chi hrang hrangah hma kan sawn a; ram thenawm China leh Pakistan a beng dai a, non-alignment policy hmangin khawvel sawrkar dangte thianah a siam bawk. India ram ropui tak roreltu atana Pathianin Pu Modi min pe hi lawmthu sawi ila, atan Pathian malsawmna i dilpui thin ang u.