Northeast Frontier Railway (NFR) chuan lo neitute tan Falakata, West Bengal leh Dimapur, Nagaland inkara tlan tur, thlai tharte phurtu tur Kisan Rail a tlantir dawn.
Rel hian thlai thar, a bikin alu a phur dawn a, Inrinnia tlantir tur niin lo neitute tana hamthatna tur niin hmarchhak lo neituten an chhawr tangkai ngei beisei a ni.
Kisan Rail hian zan dar 7:00-ah Falakata chhuahsanin a tuk chawhma dar 10:00-ah Dimapur thleng tura ruahman a ni.
Pathianni zing dar 1:00-ah New Bongaigaon thlengin Guwahati chu zing dar 5:00-ah a thleng ang a. Station tinah hian a thil phurh hlan thlak leh phurh tur hlan luh nan darkar chanve zel a ding ang.
Indian Railways hian Kisan Rail an tih, thlai thar chhe mai thei bakah bawnghnute leh sangha lam chi phurh nan a ruahman thin.
Kisan Rail hmasa ber hi nikum August 7 khan Devlali, Maharastra leh Danapur, Bihar inkarah tlantir a ni.
Heng relte hi an kawng tur ruahman sa niin a hun chiah zela an thlen leh an chhuah ngaih pawimawh a ni a. Hei hi rel kal pangngai a tihbuai loh nana tih a ni.