Mahindra Pickup 4×4 LPS Pro Muaythai inbuatsaih nan endik tura thlan bikten inrinniah international referee leh judge kaihhruaina hnuaiah training leh seminar an nei.
Muaythai Association of Mizoram chuan dik leh tha thei ang bera inbeihna endik a nih theih nan referee leh judge 15 thlang chhuakin, Chanmari West Community Hall, Aizawlah Mizoram zinga international referee leh judge pathum – Samuel Lalzorama Hmar, Dawrpui, Lalhlimpuia, Zonuam leh Liansangpuii Renthlei, Zemabawk North-ten zirtirna pein seminar an kaihruai nghal.
Tun hi Mahindra Pickup 4×4 LPS Pro Muaythai atan training leh seminar an neih vawi thumna niin Inrinni lehah chhunzawm a ni dawn.
Mizoram Muaythai Technical Commission member Liansangpuii chuan, cage chhungah fighter an inbei dawn a, Muaythai player leh official tan thil thar a nih avangin technical lamah inbuatsaih nasat a ngai tih a sawi a. “Hetiang hi Singapore combat sports promotion huaihawt One Championship bakah hmun dangah hmuh tur a awm lo va, Mizoramah hetiang taka inbeihna huaihawt a ni tur hi hmasawnna ropui tak a ni.” a ti.
Pro Muaythai-a tel tum tan October 1 thlengin LPS Office-ah inziah luh theih a ni a, October 7 atangin R Dengthuama Indoor Stadium, Mualpuiah weight hrang panga, kg 48 chin hnuai lam flyweight, kg 48 leh 54 inkar bantamweight, kg 54 atanga 63.5 inkar lightweight, kg 63.5 atanga kg 71 inkar welterweight leh kg 75 chin chung lam super middleweight huangah title an inchuh dawn a, lawmman pawisa fai Rs 3,60,000 sem chhuah tura ruahman a ni.