October ni 1 thleng awh tur a thlawna thisen pek beihpui – Raktdaan Amrit Mahotsav- chu Inrinni atang khan rampumah kalpui a ni a. Mizoramah pawh he beihpui hi Aizawl Civil Hospital Blood Bank-aah Health Minister Dr R. Lalthangliana’n a hawng. He beihpui thlak chhung hian India ram pumah thisen unit nuai 1.5 lakkhawm tum a ni.
A thlawna thisen pek beihpui tan ni ah hian Aizawl Civil Hospital Blood bank chuan hmun thumah thisen pek runpui an huaihawt a. He beihpui thlak chhung hian thisen pek inzirtirna, thisen pek a tul zia leh a hlutna inziritirna kalpui a ni ang.
Kum 2021-2022 chhungin Mizorama thisen unit 28191 lakkhawm atanga za-a 90.08 (unit 25396) chu mitlawmngai ten a thlawna an pek (voluntary) a ni a. Kumin April atanga June thlenga thisen unit 8842 lakkhawm atanga za-a 92 (unit 8203) pawh mitlawmngai ten a thlawna an pek a ni.
Sorkar thuchhuah in a tarlan danin India ram pumah blood ba- nk 2443 awm mekin, heng zinga 1541 te chu private ta an ni a. Kumin hian Arogya Setu App emaw www.eraktkosh.in hmangin Blood Donation Camp neih te chhinchhiah vek a ni a, thisen petute pawh in he App hmang hian Blood Donation Certificate an dawng zel thei dawn bawk.
Mizorama he beihpui hawngtu Health Minister Dr R. Lalthangliana chuan he beihpui denchhen hian Mizorama blood bank la awm loh na district 3-ah blood bank a awm ngei theihna tura tanlak ni se, a ti a. A thlawna thisen pek kawnga hmalatu Association for Voluntary Blood Donation (AVBD) te pawh heng district pathumah te hian branch hawng turin a ngen.