Aizawl: MNF Sub-Hqrs, Lungleiin Lunglei district Congress committee (LDCC)-in BCM pawisa Rs. nuai 26 chheprelha Education Minister Lalchhandama Ralte an puhna chu thu dik lo a nih thu an sawi.
LDCC thuchhuaha Baptist Higher Secondary School (BHSS) administrative building sakna tur NABARD atanga Rs. nuai 78 awm anga tar lan chu Rs nuai 74.36 zawk a nih thu MNF Sub-Hqrs, Lunglei chuan an sawi a. “Sorkar kalphung angin a contractor, Allied Consultancy firm-in Rs nuai 74.36 atang chuan GST 12%, Labour cess 1% bakah Consultancy firm fee belhkhawm Rs. nuai 15.67 cut-in hemi atang hian sorkar-a chhun luh ngaite chhun luh leh tur a ni,” an ti.
Heng bakah hian electrification atan 7.5% dah a la nih thu MNF Sub-Hqrs, Lunglei chuan an sawi a. “Heng a chunga mite belhkhawm Rs nuai 21.09 leh civil works hnathawhna tur Rs nuai 52.46 belhkhawm chu Rs nuai 74.36 a ni a, hei hi tender amount dik tak pawh a ni,” tiin, LDCC-in Rs. nuai 26 chheprelha Education Minister Lalchhandama Ralte an puhna chu thu dik lo a nih thu an sawi.
MNF Sub-Hqrs, Lunglei chuan he hna hi Allied Consultancy firm hminga kal a nih thu leh a chunga an tar lan tak senso ngaite pawh an dah fel vek hnuah a la bang, Rs 52,46,088 (civil works bik) atangin hna an tan niin an sawi a. Building sakna tur an lai zo hman tihah BCM hruaituten an hmunhmate a nih avangin he hna enkawl hi an kuta dah turin an ngen a, an ngenna ngaih pawimawhsak niin, hna chu BCM-in an kalpui chhunzawm ta niin an sawi bawk.
“BCM hotute hian hna pawh tha taka thawkin an thawh zawh tep tawh laia BCM hnathawh mekah LDCC-in thu dik lo an rawn vawrh chhuak ta mai hi a lungchhiatthlak kan ti hle,” MNF Sub-Hqrs, Lunglei chuan an ti a. LDCC thiltih dan chu BCM hmanga politics khelh tumna tenawm taka an ngaih thu an sawi bawk a ni.