All India Football Federation League Committee Chairman atan Mizoram Football Association Honorary Secretary chu ruat a ni a; MFA atangin mi pathum dang AIFF Committee hrang hrangah telh an ni.
Jeje Lalpekhlua chu Arjuna Award dawng thei turin (nominee) AIFF-in a hming a chhawp chhuak bawk.
Thawhtanni khan Kolkata-ah AIFF Executive Committee Meeting neih a ni a, AIFF hnuaia committee hrang hrang enkawltu tur ruat a ni.
AIFF Executive Committee Member term hnihna hmang mêk Lalnghinglova Hmar chu committee pawimawh tak League Committee hotu berah ruat a ni a, I-League bakah a hnuaia age group league hrang hrang leh Indian Women’s League-te a enkawl ang.
Hetihlai hian MFA Assistant Secretary Lalrawngbawla chu AIFF Referee Committee Member-ah ruat a ni a; MFA Executive Committee Member LV Lalthantluanga chu AIFF Finance Committee Member-ah ruat niin Lalrengpuia chu AIFF Futsal Committee Member atan ruat a ni.
Hei bakah hian AIFF chuan Arjuna Award dawng thei tur player pakhat a chhawp chhuak a, Jeje Lalpekhlua chu he award dawng thei tur hian AIFF-in Sports Ministry lamah a dilpui dâwn.