Aizawl : Horticulture deparment-in nimin khan Aijal Club-ah World Bamboo Day an hmang a. Bamboo Development Board Vice Chairman Dr. K. Pachhunga’n hmanpuiin, Delhi-a cham mek Chief Minister Zoramthanga thuchah video thlirin an ngaithla bawk.
Chief Minister chuan Mizoram leilung hausakna Mau leh Rua te chu hluta, eizawnna ngelnget pe thei a nih hre turin World Bamboo Day puala kalkhawmte chu a chah a, duhsakna a hlan.
Sorkar thuchhuahin a tarlan danin, World Bamboo Day September ni 18 chu Pathianni a nih avangin Mizoramah chuan nimin khan hman a ni a. Mau tangkaina inhrilhhriatna atan khawvel pumah he ni hi hman thin a ni.
Aizawla World Bamboo Day hmanpuitu Mizoram sorkara Bamboo Development Board Vice Chairman Dr. K. Pachhunga chuan Mizoram chu Mau tamna leh duahna hmun nia sawiin, “hlut nachang hria ram hruaitu kan nei hi kan vannei hle” a ti a. Mizoram chu Mau hmanga malsawmna chang nia sawiin, ram leilung hausakna tam tak Mizoramin a neih zingah Mau chu hlut thiam turin kalkhawmte a chah.
World Bamboo Day puala hun hmanah hian Mau chingtu mi panga hnenah best performorning farmers’ award leh Rs 5000 incentive awards leh certificate an hlan a. Mi engemawzat hnenah exibition participation certificate an hlan bawk.