Aizawl: Supply Minister K Lalrinliana’n nimin khan Govt. Muanna Godown, Zuangtuia digital weighbridge dinna tur a endik a, retailer zingah dan loa buhfai buk thin finfiah an nih chuan na taka hrem an nih tur thu a sawi.
K Lalrinliana chuan amah tawiawmtu department hotute hmaah thu sawiin retailer-te hnenah buhfai bukna tur electronic weighing scale pek vek an nih thu leh hetihlai hian retailer thenkhat patla pangngai hmang thin an awm bakah buhfai buk lem lova suak thin an awm tih report an dawn thu a sawi a, “Sorkarin a ngai thutak hle,” a ti.
Retailer-ten electronic weighing scale an kawl lai chu a chhia emaw, hman tlak loh a nih emaw chuan supply department hotute hnenah hriattir vat tur a nih thu minister chuan sawiin, dan lo anga buhfai buk an awm tih finfiah a nih chuan na taka hremna lek a nih tur thu leh mipuite pawh an chanvo dik an chan theihna tur a ni tih hriaa dik loa tite chu report thin turin a chah.
Supply minister chuan ration buhfai mipui hnenah dik taka pek a nih theih nan department-in buhfai phurtu lirthei chawpa buhfai bukna tha leh awlsam, digital weighbridge pahnih GMG Zuangtuiah dah turin hma a la tih sawiin, hemi atan hian sorkarin SEDP hnuai atangin fund pawh a pe tawh tih a sawi.
Tunhmain GMG Zuangtuiah hian weighbridge hman a lo nih tawh thin thu sawiin, “April, 2020 atang khan weighbridge hman lai chu a chhiat tak hlauh avangin a hman theih ta lo va, hei vang hian a thar dang dah leh vat tura hmalak a ni,” a ti.
Weighbridge-te hi Leotronic Scale Private Limited, Amritsar, Punjab-in an supply a, pahnih man bik, Rs. 21,68,840 atang hian 95% pek tawh niin a bang, 5% hi hawn a nih hnuah pek leh tura inrem a ni.