Nimin chhun dar 11:50 vel khan Durtlang atanga Bawngkawn lam pan, SML (tipper) MZ-01 W 5833 chu Leitan pelh hret khamah a tlan liam a, a khalhtu, Lalrintluanga (Mapuia), Durtlang Kawn veng a thi.
Lirthei chesualna hmuna kal The Zozam Times thudawn danin, tipper hi Leitan atanga Bawngkawn pana niin Leitan pelh hret kawngpui thlangah kea kalna footpath chil kaiin, a hnuai kham sang takah a lum thla a; a khalhtu bak mi dang chuang an awm lo.
Tipper hi a tlak tanna atanga meter 250 bawr vela thukah hmuh niin, a khalhtu chu lirthei awmna atanga fit 100 bawr velah hmuh a ni ve thung a, a hmunah hian a thi a ni.
Tipper hian kawngthlanga a tlan liam hmain Bawngkawn lam atanga Durtlang pana tlan scooty Ray MZ-01-W 0747 chu a su a, scooty khalhtu, Lalmuanpuia, Durtlang Leitan chuan tipper tlan thla chuan a tlanna lam kawng thlang lam a pan avangin insaseng tuma inher a tum mek laiin a su tih The Zozam Times a hrilh a, a scooty hma su chhe mah se amah tak erawhin hliam a tuar lo tih a sawi.
Lirthei chesualnaa thi, Lalrintluanga hi nizan khan an chenna inah lumen a ni a, vawiinah postmortem a nih hnuah vui a ni ang.