Party inbeihna karah ngaihdan dik siamtu lo ni rawh
Nakkum maiah Mizoramin inthlanpui kan tih mai thin, MLA General Election kan hmachhawn leh dawn a, political party hrang hrangte pawhin thapui thawhin, sorkarna siam ngei tumin an hmanhlel leh tawh a, heng an hmalakna hrang hrangte hi mipui lam pawhin kan lo chik a, a dik leh a rintlak kan lo thliar thiam ve a hun tawh hle.
Dik lo leh dawta inpuhna hrang hrang a lo chhuak zel lovang tih a sawi theih loh a, mahni party hamthatna leh hmasawnna tur a nih phawt chuan midang mitmei veng miah lo a party dang sawihnawm duh pawh an lo la chhuak zel lovang tih a sawi theih hek loh. Hetiang hunah chiah hian mipui lam pawhin party tan zawng nei ngun lova thutlukna leh ngaihdan kan lo siam thiam ve thin a fuh awm e. Chutiang tur chuan inchhiarzau leh ningkhawng hriat kawnga kan thanharh a tul bawk ang.
Mahni ngaihdan sahuai thingvawn tlat kan tumna hian rahtha min chhuah ber lova, party a nihna leh telna nei lem si lo, tan zawngte tan bur nih ngawtte hi mi puitlingzia niin a hriat loh fo thin. Mahnia ngaihdan siam thiam leh siam thei, a dik zawk leh dik lo zawk pawh thliar thiam ngei tur nih kan tum zawk tur a ni.
Political party hrang hrangte chuan an theihtawp an chhuahin, an party tan thih huam pawhin an rawn pen chhuak leh ngei dawn. Chutiang hunah chuan i chhia leh tha hriatna hmang ngei khan i duh thlang la, chhiarzau ve hret hret zel pawh i tum tur a ni.