Aizawl: Sorkar laipui hotute dawra New Delhi-a châm mek, Chief Minister Zoramthanga’n nimin khan union finance minister leh Brazilian company lian hotu pawimawhte a kawm a, Assam chief minister nena ramri chungchanga inkawm an tum erawh thulh a ni thung.
Chief minister chuan Union Finance Minister Nirmala Sitharaman-i chu Mizoramin sum lama harsatna a neihte leh Myanmar buaina avanga Mizoram raltlan awm mekte kaihhnawih hrang hrang a sawipui a, heng thilah hian sorkar laipui hmalakpuina an mamawh thute a thlen.
Union finance minister chuan Zorama thu thlente chu theihtawp chhuahsak a tum thuin a lo chhang a, PM-Devine hnuaia Bamboo link road pilot project leh scheme dang dangah Mizoram chu an lo duhsak tawh thin dan leh state hmasawnna atan theihtawpa tanpui zel a tum tur thu a hrilh.
Nimin vek khan India Brazil Chamber of Commerce (IBCC) huaihawtin New Delhi Chanakya Puri Mizoram House-ah Zorama leh Brazilian company lian hotu pawimawhte an inkawm a, Mizoram hmasawnna ruhrel dinnaah leh hriselna kawnga thawhhona awm theih dan tur te an sawiho.
Tar lan tawh angin, Mizoram chief minister leh Assam Chief Minister Himanta Biswa Sarma te chu ramri chungchangah nimin khan inbiak tumin thu an lo titlu dun tawh a, hetihlai hian Sarma hian chhungkaw lamah harsatna a neih avangin an inkawm tur hi an thulh a, September 21-ah inkawm an tum leh ta zawk a ni.