Hurricane Fiona-in a nuai avangin US thliarkar, Puerto Rico chuan electric an nei lo vek a, darkar khata km 140-a chak thlipui a tleh a ni.
Thliarkara power pe chhuaktu, Luma Energy chuan hmun thenkhatah power hi pek leh theih tawh a ni tih an sawi a; mahse, pe leh vek tur erawh chuan hun a duh deuh dawn niin an sawi.
Category 1 storm hian thliarkar hmun eng emaw zatah tui lian leh lei min a thlen.
President Joe Biden chuan emergency puangin chhanchhuah leh chhawmdawl hna thawhnaah sorkar laipuiin a pui thei dawn.
Caribbean thliarkara mi maktaduai 3.3 velin power hi nei lovin damdawi inte chu generator hmanga power pek an ni a. San Juan khawpuia hospital complex-ahy erawh an nei leh tawh niin health secretary chuan a sawi.
Lawngchawlh hmun khar a ni a, thliarkar thlawhna tumhmun lian ber atanga thlawhna thlawh chhuahtir pawh a theih rih loh.
Thliarkar lailia tlangram, Utuodo-ah chuan tui lianin a chim leh a lak avangin kawng leh lei khar a awm nual.
Puerto Rico governor chuan sikul leh sorkar hmunte chawlh a puang a. Pedro Pierluisi hian mi chengte chu a theih anga tawmhulna dap turin a chah bawk.
French thliarkar, Guadeloupe-ah a chenna in tui lianin a lak avangin mi pakhat a thi bawk.
Hurricane Fiona-in Puerto Rico a nuai hun hi kum nga kal taa Hurricane Maria an tawrh cham chiah a ni a, Maria hi he thliarkar chanchina an tawrh nat ber niin chhiatna pawh a thlen nasa hle.
A thlen hnu chawlhkar thumah pawh Puerto Rican 10% chauhvin electric an la nei leh hman a. A pek chhuahna pui ber chu chhe vekin ni tin mamawh thil pawh an buai nasa hle a ni.
Fiona hian hmarthlang lam a pan leh mek avangin Dominican Republic-ah pawh ruah tam tak sur leh lei tawlh a awm thei nia sawiin inralrin a ni a; Turks & Caicos Islands pawhin tuar thei an ni bawk.