- Ruata
Keeway India chuan sportsbike thar pahnih K300N leh K300R an tlangzarh leh ta a. K300 N hi Rs Nuai 2.65 – 2.85 man inkar a ni ang a, K300 R hi Rs Nuai 2.99 – 3.20 man inkar a ni thung dawn a. Heng bike pahnihte hian platform inang an intawm a, a kentel leh thildang hrang hrangah pawh a inang deuh vek a ni.
A khawl leh thildang
Keeway K300 N leh K300 R hian 292.4cc liquid-cooled, single-cylinder khawl an hmang dawn a, he khawl hian 27.5hp power chu 8,750rpm-ah a pechhuak thei a, 25 Nm torque hi 7,000rpm-ah a pechhuak thei bawk a, heng bike pahnihte hian 6-speed gearbox, slipper clutch kengtel an hmang ve ve dawn bawk a ni.
Bike pahnihte hi Trellis frame nghahchhana duan niin suspension lamah chuan a hmalamah 37mm fork leh a hnung lamah monoshock te a hmang a ni. Braking lam chu a hmalamah 4-piston caliper 292mm disc leh a hnung lamah single-piston caliper 220mm disc te a hmang a, ABS a nei bawk a. A ke lenzawng hi a hmalamah 110/70-17 leh a hnunglamah 140/60-17 te a ni.
K300 N hi tlemin a seat a sang zawk a, 795mm niin K300R zawk hi 780mm a ni thung a, heng bike pahnihte hi a sang tha ve ve viau a ni. K300 N hi 151kg a rit a ni a, fully-faired zawk, K300 R hi 165kg a rit a ni thung a ni. A fuel tank-ah hian K300N-ah petrol litre 12.5 a leng a, K300 R-ah hian litre 12 a leng thung a ni. K300N hian 150mm ground clearance a nei a, hei hi a tha tawk viau a, K300 R thung hi chuan ground clearance 135mm a nei thung a, hei erawh a khan a hniam thung viau mai a, market lama a elpui dangte nena khaikhin pawhin K300R hi a khan hniam pawl tak a ni.
Design leh thildang
K300 N zawk hi sporty naked bike styling nei zawk niin a bike design hi a mawi viau bawk a, K300 R hi sportbike styling, fully-faired design niin clip-on handlebar a hmang bawk a, hei pawh hi a mawi viau bawk a, a pahnihah hi chuan a leituten an duh chi zawk an thlang mai dawn a ni. Heng bike pahnihte hian underslung exhaust felfai taka vuah bakah, all-LED lighting digital display an nei a. K300 N leh K300 R te hi rawng chi 3 ve ve – white, red leh black te duhthlan tur a awm a. K300 N zawk hian rawng hil chi, matte finish neiin, K300 R hian rawng tle chi, glossy finish a nei thung a ni.
Naked bike zawk K300N hian CF Moto 300NK, India ramah pawh lo tihchhuah tawh thin design ang a nei a, K300 R zawk hi chuan khawvel hmun danga kan hmuh ang, CF Moto 300SR design a rawn nei thung a ni. CFMoto international website a tarlan danin Keeway bike te hian specifications leh design element lamah CF Moto a tawm a, hei hian Keeway chu CFMoto motorcycle ho rebadged a ni tih te pawh a lantir thei awm e.
An elpui turte
Keeway K300 N leh K300 R te hian BMW G 310 R leh tunhnai maia tlangzarh G 310 RR sportbike te a el dawn a, hei bakah hian Honda CB300R te nen pawh a inel thei awm e. A khawl leh a tha pekchhuah thlir chuan CB300F leh Suzuki Gixxer 250 bakah SF 250 te nen pawh a inel a tih theih bawk awm e. Sports bike pahnih design hrang mawi tak leh chak tha tak India market-ah a lo awm belh leh ta a, helama tuipui tan chuan chanchinthar lawmawm tak a ni dawn a ni.