Kum 2025 ral hmaa Mizoram atanga Tuberculosis (TB) natna umbo tura state pum huap hmalakna, ‘State wide Adoption of Pradhan Mantri TB Mukt Bharat Ahiyan’ chu nimin khan Larsap Hari Babu Kambhampati-a’n a hawng.
TB umbo tura hmalakna hawnna, Durbar Hall, Raj Bhavan-a neihah hian larsap chuan kum nga chhungin Mizoramah TB natna umbo a nih theih a rin thu a sawi a, he beihpui thlaknaah hian sorkar, tlawmngai pawl, Kohhran leh khua leh tui zawng zawngte inlungruala tha taka an thawhho erawh a pawimawh tak zet dawn tih a sawi.
Larsap chuan TB natna chungchangah inzirtirna uar taka kalpui te, he natna veite thinrik mai lova ngaihsak nachang hriat a tulna te, he natna hi damdawi hmanga enkawl leh damdawi a thlawna dawn a nih chungchang te leh TB natna chu kai lo tura inven theih a nih chungchang te mipuiin an chian hle a ngai tih a sawi bawk.
Kambhampati chuan TB natna veite chu eizawnna lamah mi harsa tak takte an nih avang leh he natna vei chunga hnahram thawh a harsat avangin tanpui an ngai tih a sawi a, TB veite chaw hrisel leisak duh tan Nikshay Mitra Programme kaltlangin pawisa a thawh theih a, tun dinhmunah mi tlawmngai 22-ten ei tur lei nan sum an thawh tawh tih a sawi a ni.
He hunah hian Health Minister Dr R Lalthangliana pawhin thu sawiin TB natna umbo tura tehfung atan kum 2015 hman a ni tih a sawi a, Kum 2015-a TB natna thihpui zat aia TB veia thi 80%-in a tlem zawk hunah hlawhtling anga chhiar a ni dawn tih sawiin, “Mizoramah kum 2015 khan TB avangin mi 38 an thi a – he statistics atanga chhut chuan kum 2025-ah chuan Mizoramah TB natna avanga nunna chân mi pali aia tam an awm lohna tura hmalak a ngai,” a ti.
TB natna umbo turin testing tam tak tih a tul thu health minister chuan sawi bawkin, hemi atan hian Central TB Division chuan Mizorama RD Block zawng zawnga bun turin Truenat Machine 26 mamawhna chu a pawmpui tawh tih leh tunah hian TB case-te uluk taka chhui zui leh a veite umzui an nih theih nan Central TB Division leh Mizoram sorkar tangkawp chuan TB test-na tha tak – Culture & Drug Susceptibility Testing Laboratory (C&DST Lab), Falkawnah a buatsaih mek tih sawiin, hawn thuai theih tura peih fel thawkhat a ni tawh tih a sawi bawk a ni.