- Upa Lalthara, Kohima (9436001667)
- RINGTU NGHET LEH THA NI TUR CHUAN KAN NIHNA HRIAT CHIAN A, CHUTA DIN NGHEH A PAWIMAWH.
21.1 Heng ringtute nihna leh dinhmun ropui tak – Pathian fa (Pathian hrin ngei) kan nihna te, Pathian pawh ‘Abba, Kapa’ ti-a ko thei leh, ko tur kan nihna te, Pathian ro luahtu (Krista ro luahpuitu) kan nihna te hi kan hriat chian loh chuan ringtu tha leh nghet nih a harsa ang. He kan nihna hi Kristian chhungkuaa lo piangte tan chuan atir atanga kan nihna leh Pathianin min dahna a ni a. He kan nihnaa nghet taka min dintir thei lo tur zâwnga kan thalaite hnêna thu sawi pawh hi insûm deuh a that hmêl zâwk ta.
21.2 Mihring chhungkuaa nu leh pate pawh hian, kan fate nihna leh dinhmun (kan fa ngeian nihna) hi mi dangten rawn sawi derthâwng thin ta se chu kan duh hauh lo vang le. Kan faten an lo rin mai phei chuan, chhungkaw inpumkhatna tichhe theitu a ni ngei ang. Hetiang tho hian, ringtute ‘Pathian fa’ kan nihna min rinhlelhtîr thei tur zâwnga thu sawi te hi kan Pathian lawm zâwng a nih a rinawm lo. A hmaa kan sawi tawh ang khan, Israel chhungkaw tin tena an tih tur pawimawh ber pakhat chu, Pathian hnam thlan (Pathian mite) an nih thu leh, an hnam tana Pathianin thil tam tak a lo tih tawhte an fate hrilhhriata, thanhnantir tlat kha niin a lang. (Hei hi Thuthlung Bawma Arona tiang leh manna Pathianin a dahtir nachhan leh, manna, ni khat bak dah that theih loh kha Thuthlung Bawma kum tam tak chhe lova a awm theih nachhan kha.)
21.3 He khawvêl thilah pawh hian mahni nihna dik tak hriat hi a tul-in, mi fing leh fel nihna a ni a. Mahni nu leh pa nihna leh, mahni nihna dik tak hre lote hi chu an tâl buai fovin, mi nuihzat an hlawh bâkah, an nih tur thleng pha lovin an awm thei bawk ang. USA rama ‘sal chhuah’ an puan tum pawh khân, (tunlai angin media a la tha si lova) sal tam tak, ram hnuai pilrila hna thawk mêkte kha chuan kum tam tak chhûng (mi zalên an ni tih an hriat chhuah hmâ kha chuan) an pûte sal anga innngaiin, chutiang tak chuan an awm zui zêl mai a nih kha.
21.4 Hetiang deuh bawk hian, thlarau lama ‘Pathian hrin’ leh ‘Pathian fa’ kan nihna kan hriat chian loh chuan, kan thlarau nunah leh, ringtuten puitlinna kawng kan zawhnaah te hian kan thlen phâk tur thleng phâk lo, ringtu sawngnâwi tak, tui anga nghet lo kan nih reng phah thei dâwn a lo ni. Bung 11- a kan sawitawh ang khan, hetia Pathian fa kan lo nihna-ah hian keimahni tih ve eng mah a awm lova; Kristian chhungkuaah leh Mizo hnama kan nu leh paten min hrinna-ah pawh hian kan thawh ve engmah a awm lo. Heng kan nihnate hi Pathianin min siam dan leh min dahna/ min kohna an ni a. Hei hi kan hriat chian a, kan pawm thiam a, chu kan nihna-in a kentel leh a phut ang nun kan tum thin chuan, ringtu nghet leh tlo kan lo ni thei ang.
21.5 “Unaute u, a kohna leh a thlanna che u hi tilang turin theihtawp chhuahin nghet takin ding rawh u; chutianga dingte chu englai mahin an tlu chhe lovang” (2 Pet 1:10) tiin Bible pawhin a lo sawi ngei a ni. Heng kan nihna (Pathianin min kohna leh min tlanna) hi hre chiang lo emaw, Evi leh Adama te anga duh tawk lo emaw, a phatsan zawng emaw a kan khawsak chuan ringtu nghet kan ni thei ngailovang a; hetianga min thlangtu tan pawh a lawmawm lovang. Fapa tlanbo tehkhin thu-a, fapa tlanbovin a nihna a lo theihnghilh der tawh thu leh, chu a nihna (pa rintlak leh belhtlak nei a nih) a inhriatchhuah veleh-a, a pa hnena a kir leh ta ang khan, tunlaia kan thalai beidawnna khura tang mek te, ngawl hrang hrang vei te leh, sual kawng zawh mekten an mamawh chu ‘pian thar’ ni lovin, Pathian fa an nihna an inhriatchhuah a, an Pa hnena kir leh hi niin a lang.
21.6 Mihringa hrin kan nih hi thil thleng nawn thei a ni lo ang bawk hian, Kristian chhungkuaa lo piangte leh Lal Isua rawn ring thar te Pathian hrin (gennao anothen) kan nihna pawh hi thil thleng nawn thei a ni lo vang. Tunlaia mi thenkhat ‘piang thar’ nawn fo anga inchhalte hi chuan, ‘inhmuhchhuah thar’ te ‘harh thar’ te, ‘inhlan thar’ leh ‘phur thar’ angthilte hi ‘pian tharna’-ah an ngai a nih hmel khawp mai. Thil tam tak hi a siam thar theih a; mihring rilru leh ngaihtuahna te, kan thlarau lam nun thlengin, siam tharin an awm thei a. Mahse, ‘pian thar’ emaw, ‘pian nawn’ emaw hi chu thil awm thei niin a lang lo. Bible-ah pawh tumah an ‘pian thar’ thu emaw, an ‘pian nawn’ thu emaw a lang lo. Tichuan, ‘pian tharna’ kan kalpui mek dan hi chu Pathian fa kan nihna hre fuh hlei thei lova min siamtu leh, ringtu nghet lo (tui anga maia nghet lo)-va min siam thintu a nih theihna lai a awm tlatin a lang.
(la chhunzawm tur)