Aizawl: ZPM Working President K Sapdanga’n, “Tun ang tluka kan ramin retheihna kan hmachhawn hi a la awm lo,” tiin, mipuiin dan anga rorel tur an duh a, rinngam an zawng niin a sawi.
Nimina ZPM party chhung inkhawmah he thu hi ZPM working president chuan a sawi a. “Kan rama roreltute hi Kristian an ni a, ro an relsakte pawh Kristian tho an ni a, ram rorelnaah hian Pathian ram lo thleng sela, ram dan zawm ni rawh se,” a ti.
K Sapdanga chuan, “Kan maganna lak ata hi kalphung thar, mipui sorkar, chief minister atana mipuiin kan awh rawn luai luai hmang hian mipuite inchhanchhuak ang u,” a ti a. “Zalenna sualtute kha kan zah a, kan tan em em a, mipute pawhin nasa takin kan tuar,” tiin, “Tuna ro an rel tak hnu hian chanchin thar ngaihnawm pawl ni ta chu, ‘sorkar hnathawkin a hun takah hlawh an la mai thei’ tih te, ‘sum pe chhuak thei lo mah se treasury khar a ni lo,’ tih te, ‘kum thar atang contract hna dik takin pek a ni tawh ang’ tih te, ‘NABARD atangin Rs. vbc 200 puk a ni dawn’ tih te a ni a, a lungchhiatthlak zawk,” a ti.
ZPM working president chuan, “Sum pûk hmanna zawh chhuah awih lohte hi kan ram dinhmun a lo ni ta a, thluaka sum lut te, leiba tam tual tual sorkar kan hrawn tak avangin he sorkar lak atang hian zalenna sual lo thei lovin kan inhre ta a; law & order sawi tur a awm lo va, hotupa ber mumang kan um vut vut a ni mai a ni,” a ti a. “Mizo mipuiten zalenna kan sualna hmanrua atan chuan silaite kan hmang ve lo vang a, zalenna sualna tangkai ber, EVM kan hmang dawn a. Chumi hunah chuan kan zalenna chu keimahni inpek tur a ni,” a ti bawk.