La Liga champion lai Real Madrid in an lallukhum humhim tumin tlawm la nei miah lovin season an hmang mek a. An hmelma Atletico Madrid lakah 2-1 a hnehna changin tun season league inkhel vawi ruk atang vawi ruk an chak.
Pathianni zan khan Atletico Madrid khelmual Wanda Metropolitano-ah tun season a El Derbi Madrileñohmasa ber hi khelh a ni a. First half-ah an thiampuipa Karim Benzema tel lova khel Real Madrid chu team langsar lo zawkah tang thin mahse minute 18-naah Rodrygo Goes hmangin goal an khung.
Halftime hma in Federico Valverde chuan Vinicius Jr. goal shoot atangin an goal hnihna a khung leh bawk.
Mario Hermoso chuan Atletico tan huntawp dawn lamah goal khungin beisei siam mahse red card a hmu zui a. An tan chakna kawng a awm tawh lo.
Spain-ah Madrid derby boruak a lian thin a, tun tumah a boruak a lian zual. Real forward Vinicius-a goal khung zawha lam thin chu tunhnaiah sawisel a ni a, sawiselna tawngkamah vunrawng inthliarna a tel niin mi tam takin an ngai.
Footballer dangte leh social media lamah thlavang hauhtu a ngah hle a. Chutihrualin an khingpui tur captain Koke chuan an muala a lam chuan thil pawi a ni ang tiin inkhelh hma in a lo sawi lawk.