Kum 2025-a Mizorama |hingtam lo thleng tur bul intan nan sazu a puang mek niin agriculture department hotuten an sawi.
Tunlai hian Mizoram hmun hrang hranga thlawhhmaah sazu a puang nasa hle a, buh seng mai theih tur a ei chhe nasa hle a ni.
The Zozam Times-in a kawmnaah Agriculture Director James Lalsiamliana chuan kum 2025-ah rawthing a tam dawn tih sawiin, “A sehsamah sazu hi a rawn puang ta vakah kan ngai,” a ti.
Mau a tam dawn reng rengin, a tam tak tak hma kum khat emaw, kum hnih hma lamah emaw a sehsam rawn langin sazu a lo puang thin tih sawiin, chumi avang chuan kumin kumtir lam atang khan sazu puang beihna turin district tin agriculture office chu sazu tûr an lo thawn lawk tawh tih a sawi.
Agriculture director chuan tun dinhmuna report an dawn chinah Lunglei, Mamit, Khawzawl leh Hnahthial district chhungah sazu a puang tih sawiin, “Lunglei leh Mamit district-ah a nasa zual a, a bak hmun dangah chuan sazu hi a che na vak lo,” a ti.
Agriculture department-in an chhinchhiah chinah Lunglei district chhunga Lunglei Agriculture Block chhung khaw riat, Lungsen Block chhung khaw thum leh Bunghmun Block chhunga khaw 16-a thlawhmaah sazu puangin thlawhhma thenkhat chu a bei na hle.
Mamit district chhungah pawh West Phaileng Block chhung khaw rukah sazu hi puang bawkin, Tuirum khuaa chhungkaw pasarihte thlawhma hectare hniha zauva buh an chín phei chu sazu hian a seh zo vek a, buh thar tur an nei lo anga ngaih a ni.
Agriculture department-in a chian tawh chin heng khaw 33-a sazuin thlawhhma a khawih ram zau zawng chu hectare 295.6-a zau a ni.