Sivasagar district, Assam-a police-te chuan kumtlinglo pakhat leh mi dang pathum chu online-a game an khelhna atan ni ngeia hriatin a pa bank account atangin Rs. nuai 19 zet an lo lak chhuah avangin man an ni.
Police-in an sawi dan chuan pawl sarih zirlai naupang hi naupang dang pahnih leh kum 21 mi nen mobile phone-a online games an khelhna atangin an inhria a. Sivasagar district-a cheng vek an ni.
“Naupangte leh kum 21 mi hian online banking hmangin pawl sarih zirlai naupang pa bank account dinhmun hi an hria a, Rs. nuai 19 vel chu hmun hrang hrangah an pe chhuak kual a ni,” tiin Rakesh Raushan, Superintendent of Police, Sivasagar chuan a sawi.
Naupang pa hi mi mala tuialhthei laih chhuahnaa thawk, engineer a ni a, a bank account an khawih tih hi a hre mai lo va, a nupui phone-a sms (short message service) thleng pawh an fapa hian a paihsak zung zung a ni.
Police chuan pawisa an khawih chet vel hi bank lamin naupang nu hnena an hrilh daih tih erawh an la hre mai thei lo.
An hriat chhuah hnuah pa ber hian Joysagar police outpost-ah kar hmasa khan thubuai a thehlut ta a ni.
Indian Penal Code (IPC) section 420 leh 406 hnuaia thubuai ziah luh a nih hnua police-in an chhui zuina atangin an fapa leh mipa naupang dang pahnih, unau leh kum 21 mi, Nipuraj Gogoi (21) chu Inrinni khan an man ta a ni.
“Eng ang chiahin nge he thil hi a inphan kual leh pawisa an thawn chhuahsak nen hian eng anga inzawm nge tih chu chhui zui mek zel tur a ni a, hetianga thil tih ching thuk tak pawh an lo inphum ru reng thei bawk,” tiin Raushan chuan a sawi.