Aizawl: Zo-fa Tangrual Pawl chuan Mizoram chhunga Assam police awmte an insawn chhuah hma lo leh Assam miten Mizoram mite huan leh thlai an tihchhiat man an chawi hma loh chuan ramri chungchangah inbiakna awm tawh lo se an duh tih an sawi.
Nimin khan Zo-fa Tangrual Pawl hruaitute chuan Aizawl Press Club-ah press conference neiin, ramri chungchanga an duh dan leh ngaihdan hrang hrangte chanchinbumite hmaah an puang.
Zo-fa Tangrual Pawl chuan Mizoram chhunga Assam police awm mekte chu insawn chhuak thuai se an duh thu leh Assam miten ramri hrula Mizote huan thlai an tihchhiat man chu an chawi ngei tur a nih thu an sawi.
“Assam sorkarin kum 1971 atanga 2022 chhunga Lushai Territory Inner Line Forest an luah man chhiah chu Mizoram sorkarah an chhung lut ngei tur a ni,” an ti bawk a, hengte hi tihhlawhtlin a nih hma chuan Mizoram sorkarin Assam sorkar chu ramri chungchang sawipui tawh lo se an duh tih an sawi.
Mizoram sorkar pawh Mizoram chhunga Assam mite awm mek chu an chhuahtir ngam lo a nih chuan an sorkarna chu thiat ngam se an ti a, a nih loh chuan President’s Rule-a Mizoram a awm theih nan theihtawpin ke an pe dawn tih an sawi bawk a ni.