Blackpink studio album pahniha chuan fan te leh critic lamin an dawnsawng that hle laiin, b-side a hla pakhat, ‘Typa Girl’ chu tha lo tia, sawiselna a riring ta hle.
Hun rei tak an reh hnu-a an rawn inlar lehna, ‘Born Pink’ album hi music chart hrang hrangah a lawr zawk zawk reng a, mithiamte review pawh a tha in, an chawtui ber a nih rual hian, he hla thu hi ngaimawh a, dawngsawng fuh hlei thei lo pawh an tam.
‘Typa Girl’ hi lehlamah chuan fan te hla duh ber pawl a ni mek a, a hla beat catchy tak leh vocals mawi tak mai hi hmuh hmaih thiang a ni lo. Khawvelpuma iTunes songs chart leh Global Spotify Chart-ah te hmun a chang sang hle a, spotify-ah hian tlangzarh karchhung khan vawi maktaduai 10 chuang stream hman a ni.
Hlawhtlinna tam tak karah a hla thu dah dan leh awmdan hi enliam mai thei lo pawh an tam hle reng a, hmeichhe tam zawk ang lo taka zahna chhete pawh tel lova mipa pak huam huam a, mipate ngaihven hlawh tura che kual vel sawina, ‘pick me’ an tih ang chiah kha a ni a, he ‘pick me’ tih tawngkam hi K-pop lamah tunhnai khan a hluar thar a, an hmang tam malh malh hle. A bik takin, 4th generation female idol te zingah hmangtu an pung.
“I’m not like these other girls at all, I’m the typa girl that make you forget that you got a type,” tih hla thu hi ‘Typa Girl’ ah chiang takin a lang a, hmeichhe hnuaichhiahna a nih leh nih loh chungchangah pawh social media-ah inhnialna nasa tak a chawkchhuak mek.
Heti lai vek hian, fans tam takte chuan hla thu hi an pawmzam viau lawi a, lak thutak a, buaipui luai luai chi ah an ngai lo thung.
Tarlan tawh angin, ‘Born Pink’ album tlangzarh Ni ah K-pop chanchinah history siamin, maktaduai khat chuang an hralhchhuak.
‘Born Pink’ hi September 16 khan tihchhuah niin, BlackPink album puitling pahnihna ni bawk hian ram hrang hranga music charts-ah pakhatna an hauh fur.
Hanteo Chart tarlan danin, ‘Born Pink’ hi September 16 khan copy 1,011,266 hralh chhuah niin, Hanteo chanchina hmeichhe artist zinga album tlangzarh Ni a copy maktaduai khat chuang hralh thei hmasa ber leh awmchhun an ni.