Chelsea chuan an sporting director thar ni turin Christoph Freund chu lakluh ngei an tum a, RB Salzburg in chelh chhunzawm duh mahse inbiakna ngawrh takin an kalpui.
Kum 45 mi hi Chelsea nen inbiakna an nei nual tawh a. London club hian ani bakah Bayer Leverkusen a hna thawk mek Tim Steidten leh Paris Saint-Germain a Luis Campos te pawh an ngaihven.
Hetihlai hian Liverpool sporting director thin Michael Edwards pawh sawi tel nimahsela amah Edwards hian inbiakna an neih loh thu a lo sawi tawh.
Freund hi Salzburg-ah hian tunah Manchester City striker Erling Haaland lakluhna kawnga mi pawimawh niin an sawi a. Ani bakah Sadio Mane, Naby Keita leh Dayot Upamecano te tana kawng hawntu niin an sawi bawk a. Stamford Bridge a insawn duh mahse Salzburg hian chelh an tum hle.
Austrian club, sum lama ngaihtuahawm bik lo hian Freund hi kum 2015 atang khan sporting director atan an hmang a. An hnena cham chhunzawm turin hlawh tha zawk nen an sawm ve mek.
Chelsea hian November thla a World Cup khelh tan hma ngeiin sporting director pangngai neih an duh.