Aizawl: Power & Electricity department-in kawlphetha chhit man lak dan kalphung chu post-paid atanga pre-paid-ah thlak a ni dawn tih sawiin, December, 2023-ah chuan pre-paid smart meter chu hman vek tum a nih tawh thu an sawi.
P&E department chuan sorkar laipui hmalaknaa Revamped Distribution Sector Scheme hnuaiah consumer meter zawng zawngte prepaid smart meter-a thlak vek tura hmalak mek a ni a, smart meter kalpui tura department-in sanction a hmuh tawh thu an tar lang.
Smart meter-ah hian communication atan wireless a hman dawn avangin meter dahnate hmun ualau deuh a ngai tawh dawn tih sawiin, hemi kawnga department hmalakna tha taka lo tawiawm turin mipuite an ngen a, post-paid atanga pre-paid-ah insawn a ngaih dawn avangin nakinah harsatna a thlen loh nan electric bill bate pe fel zel turin leh contracted load pawh êng an chhit tam lai ber ang mila lo in-update turin an ngen.
P&E department chuan pre-paid smart meter chu hlawhtling taka hman a nih theih nan hriattirna chi hrang hrangte la tihchhuah a tum tih sawi bawkin, hengte hi lo ngaihvena theihtawpa department hmalakna lo tawiawma thawhpui turin mipuite an ngen tih an thuchhuahah chuan an tar lang bawk a ni.