TB umbo tumna hlawhtling ngei teh se
Mizoramah kum 2025 hma ngeia Tuberculosis (TB) natna umbo tumin theihtawp chhuah mek a ni a, hemi atana inbuatsaihna ‘State wide Adoption of Pradhan Mantri TB Mukt Bharat Ahiyan’ chu Mizoram Larsapin a hawng bawk.
Kan hriat angin tunhma atangin TB natna hi mizote zingah pawh a lo hluar tawhin, tunhma phei chuan thinhrik hial an tawk thin a, natna tihdam theih lohah ngaiin an lo khung hrang hial thin bawk.
Hun a kal zela khawvel hmasawnna leh hriatna lo tha zel karah tihdam theihna natna a ni tih hmuchhuakin, damdawi ei hunbi a ei a, inenkawl uluk bawk chuan tihdam thuai theih a nih thu kan hre ta zel a, hei hian umbo kawngah pawh nasa takin hma a sawn phah ngei a beiseiawm bawk.
He hun hawnnaah hian Larsap chuan TB natna chungchangah inzirtirna uar taka kalpui te, he natna veite thinrik mai lova ngaihsak nachang hriat a tulna te, he natna hi damdawi hmanga enkawl leh damdawi a thlawna dawn a nih chungchang te leh TB natna chu kai lo tura inven theih a nih chungchang te mipuiin an chian hle a ngai tih a sawi bawk a, mipui lam pawhin kan hriat thar a, natna hlauhawm lo leh inenkawl that ngai, umbo ngei theih a nihzia kan hriat thar ve zel a tul hle.
He mission hi a hlawhtlin ngei theih nan tute mai pawh thawkho tha ila, kan tuchhuante zel tan pawh TB awm lohna ram nih i tum zel ang u.