French club Nice chuan an manager Lucien Favre thlaktu ni turin Mauricio Pochettino chu hmin theih an inbeisei.
Kum 64 mi Favre hnuaiah hian season bul an tan that loh avangin tunhnaiah a dinhmun a nghet lo niin thu a thang mek a. Nice hian an match hmasa pariat atangin vawi hnih chauh hnehna an chang.
Hmun thenkhata thuthangah Nice neitupa Sir Jim Ratcliffe chuan Swiss manager hi chhuahtir thlengin a ngaihtuah mek a. Pochettino hi a thlaktu atana hming langsar leh an duh ber a ni mek.
French club hian a hlawh atana a phut ang zawng zawng pek an inhuam niin an sawi bawk a. Hetihlai hian hmun thenkhatah erawh kum 50 mi Pochettino hian France a hnathawh chhunzawm aiin ram dang pan a thlang dawn niin an sawi ve thung.
Paris Saint-Germain leh Tottenham Hotspur manager hlui hian Premier League a kir leh a duh a, England-ah a hming a la that avangin hna thawh leh ngei a inbeisei.
Argentine coach hi July thla khan PSG in an ban a, French champion hi thla 18 an club a enkawl chhungin Ligue 1 title la mahse UEFA Champions League-ah semi-final aia thui a thlenpui thei lo.
Pochettino hian kum 2014 atanga 2019 inkar khan Tottenham a enkawl a, kum 2019 khan UEFA Champions League final thlenpuiin Liverpool lakah an tlawm a. Kuminah Manchester United leh Chelsea ten manager an dap laiin a hming sawirik a ni ring hle bawk.