Aizawl: Aizawl Bawrhsap Pisa chuan sorkar hriatpui loh private placement agency-te lakah fimkhur turin hna zawng mekte an chah.
Hemi chungchanga thuchhuah an siamah Aizawl Bawrhsap Pisa chuan tunlai hian Aizawl district huam chhungah The Mizoram Private Placement Agencies (Regulation) Act, 2015 hnuaia licence nei lo agency lem eng emaw zat an awm tih hriat a nih thu leh heng mite hian state pawnah leh ram pawnah hnathawk turin mi an tir chhuak thin tih an sawi.
Bawrhsap Pisa chuan Constitution of India hnuaia Article 23 (1)-in a tar lan angin sorkar hriatpui loa hnathawk tur mi tirh chhuah chu human trafficking-a inhamhnawiha ngaih an ni tih sawiin, “A hremna pawh a sang hle,” an ti.
Sorkar hriatpui loh agency kaltlanga hmun danga hnathawkten an hnathawhna hmunah harsatna an tawhin sorkar angin hma lak a harsa tawh thin tih an sawi a; chumi avang chuan hna zawng mekte chu heng agency-te lakah fimkhur tur leh sorkar hriatpui agency-te chauh dawr thin turin an ngen tih an tar lang bawk.